Bakı, 20 iyun (AZƏRTAC). Maliyyə Nazirliyi yaxın gələcəkdə aqrar sahədə sığorta xidmətlərinin tətbiqi ilə bağlı təklifləri hazırlayaraq hökumətə təqdim edəcəkdir.

AZƏRTAC xəbər verir ki, bunu maliyyə naziri Samir Şərifov jurnalistlərə açıqlamasında demişdir.

Nazir bildirmişdir ki, bu sığorta növünün bazarı çox məhduddur. Həm əhalinin bu barədə məlumatı azdır, həm də mövcud mexanizmlər təkmil deyildir. Nazirlik və böyük sığorta şirkətləri hazırda aqrar sığortanı inkişaf etdirmək üçün xarici təcrübəni öyrənirlər.

Tibbi sığortaya gəldikdə isə, nazir vurğulamışdır ki, bu sahədə qanunvericilik bazası vardır. Son illərdə səhiyyə sistemində aparılan infrastruktur dəyişikliyi və modernləşmə tibbi sığortanı gündəlik həyatımızda tətbiq etməyə imkan verir.