İDMAN
Yeddinci “Zirvə” Beynəlxalq Uşaq Oyunlarında ağır atletika yarışlarında qaliblər müəyyənləşib
Bakı, 6 may, AZƏRTAC
Ümummilli lider Heydər Əliyevin anadan olmasının 96-cı ildönümü münasibətilə Xırdalanda və Astarada keçirilən 7-ci “Zirvə” Beynəlxalq Uşaq Oyunları davam edir.
Azərbaycan Ağır Atletika Federasiyasından AZƏRTAC-a bildiriblər ki, 12 ölkədən 4 mindən çox atletin idmanın 27 növü üzrə mübarizəyə qoşulduğu turnirdə ilk olaraq ağır atletika yarışlarında qaliblər müəyyənləşib.
Yeddi ölkədən – Azərbaycan, İran, Gürcüstan, Türkiyə, İsrail, Moldova və Ukraynadan 200-ə yaxın uşaq ağır atletin qatıldığı turnirdə 30 kiloqramadək oğlanların mübarizəsində Şamaxı təmsilçisi Xəyyam Allahverdiyev toplam 74 kiloqram (31+43) nəticə ilə çempion olmağı bacarıb. Sonrakı pillələri 71 kiloqramla (32+39) Əli Məmmədov, 67 kiloqram (29+38) nəticə ilə Nihad Zairov tutublar.
Turnirdə 34 kiloqramadək çəki dərəcəsində yeniyetmələrin yarışında qazaxlı atlet Amin Osmanov toplam 97 kiloqram (42+55) nəticə bütün rəqiblərini qabaqlayaraq qızıl medal qazanıb. Gümüş medala 87 kiloqram (38+49) nəticə ilə Nahid Ağayev sahib olub. Bürünc medala isə 81 kiloqram (37+44) nəticə ilə Əli Məhərrəmzadə layiq görülüb.
Digər çəki dərəcələri üzrə yeniyetmələrin mübarizəsində isə toplam 99 kiloqram (44+55) nəticə göstərən Dəniz Cabbarlı (38 kq) və 117 kiloqramı (52+65) başı üzərinə qaldıran İsmayıl Xansuvarlı (42 kq) qalib adını qazanıblar.
“Zirvə” beynəlxalq idman klublarının təşkilatçılığı ilə keçirilən yarışlarda idmançılar ağırlıqqaldırma, atçılıq, basketbol, boks, cüdo, futbol və çimərlik futbolu, bədii gimnastika, idman gimnastikası, sərbəst güləş, yunan-Roma güləşi, karate, kartinq, kikboksinq, şahmat, taekvondo, tennis, üzgüçülük, çimərlik voleybolu və voleybol, badminton, atletika növlərində mübarizə aparırlar.
Mayın 28-dək davam edəcək “Zirvə oyunları”nın məqsədi ulu öndər Heydər Əliyevin irsinin yaşadılması və gələcək nəsillərə çatdırılması, eyni zamanda, idmanın təbliği və inkişafı, idmançılar və məşqçilər arasında dostluq əlaqələrinin möhkəmləndirilməsi, atletlərin ustalıq səviyyəsinin artırılması və təkmilləşdirilməsi, məşqçi-müəllimlərin işlərinin qiymətləndirilməsidir.