İDMAN


Yeddinci “Zirvə Beynəlxalq Uşaq Oyunları”nın təntənəli açılış mərasimi olub

Bakı, 11 may, AZƏRTAC

AAAF Park Yaşayış Kompleksində ümummilli lider Heydər Əliyevin anadan olmasının 96-cı ildönümünə həsr olunmuş 7-ci “Zirvə Beynəlxalq Uşaq Oyunları”nın təntənəli açılış mərasimi olub.

AZƏRTAC xəbər verir ki, tədbirdə Azərbaycan və dünya idmanının, həmçinin ölkə ictimaiyyətinin tanınmış simaları, Olimpiya çempionları, Avropa və dünya çempionatlarının qalib və mükafatçıları, Azərbaycan Gənclər və İdman Nazirliyi, Milli Olimpiya Komitəsi, müxtəlif qurumların nümayəndələri iştirak ediblər.

İyirmi yeddi idman növündə 12 ölkədən 4 mindən çox uşaq idmançının qatılacağı möhtəşəm yarışın açılış mərasimi də maraqlı və diqqətçəkən alınıb.

Tədbirdə ilk olaraq Oyunlar barədə məlumat verilib. Qeyd olunub ki, “Zirvə” beynəlxalq idman klublarının təşkilatçılığı ilə keçirilən bu Oyunlar ənənə halını almaqdadır. “Zirvə Oyunları”nın keçirilməsində məqsəd Ulu Öndərin irsinin yaşadılması, onun ölkəmiz üçün etdiyi işlərin gələcək nəsillərə çatdırılması, eyni zamanda, idman növlərinin yerlərdə təbliği və inkişafı, idmançılar və məşqçilər arasında dostluq əlaqələrinin möhkəmləndirilməsi, idmançıların ustalıq səviyyəsinin artırılması və təkmilləşdirilməsi, yarış vərdişlərinin mükəmməlləşdirilməsi, məşqçi-müəllimlərin işlərinin qiymətləndirilməsidir.

Həmçinin bildirilib ki, builki yarışlarda idmançılar ağır atletika, atçılıq, basketbol, boks, cüdo, futbol və çimərlik futbolu, bədii və idman gimnastikası, güləş (sərbəst, yunan-roma), karate, kartinq, kikboksinq, şahmat, taekvondo, tennis, üzgüçülük, çimərlik voleybolu və voleybol, badminton, atletika növlərində medallar uğrunda mübarizə aparacaqlar.

Sonra yarışa qatılan bütün idman növləri üzrə hər birindən 12 iştirakçı meydançaya dəvət olunub. Təntənəli marş sədaları altında onların hər biri öz yerlərini tutub, böyük bir idmançı qrupu formalaşıb. Yarışların xüsusi geyimində olan parad iştirakçılarının keçidi böyük alqışlarla müşayiət olunub, rəğbətlə qarşılanıb.

Zirvə Oyunlarının açılış mərasiminin ab-havasının daha da yaddaqalan edilməsi üçün bədii hissəyə keçilib.

İlk “Zirvə Oyunlar”ının iştirakçısı, hazırkı, 7-ci Zirvə Beynəlxalq Uşaq Oyunlarının isə təşkilatçılarından olan Ceyran Heydərli də çıxış edib. O, yarışın əhəmiyyəti barədə danışaraq, ulu öndər Heydər Əliyevin idman irsinin qorunub-saxlanmasının vacibliyini qeyd edib.

Sonda “Zirvə” beynəlxalq idman klublarının prezidenti, sabiq ağır atlet, Olimpiya Oyunlarının iştirakçısı Tofiq Heydərov yarışları rəsmən açıq elan edib.

Tədbirə möhtəşəm atəşfəşanlıqla yekun vurulub.

Qeyd edək ki, mayın 28-dək davam edəcək yarışlar Xırdalan və Astarada keçirilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.