REGİONLAR


Yədulla Ağazadə: 44 günlük Azərbaycan həqiqətləri iki əsrlik erməni yalanlarını alt-üst etdi

Lənkəran, 25 noyabr, Bağır Əliyev, AZƏRTAC

Qırx rəqəminin çətinlik, ağırlığı ehtiva etməsi sirr deyildir. 40-dan çıxmaq qurtuluşdur, qələbədir! 44 günlük Vətən müharibəsi çoxdan gözlədiyimiz arzularımızı reallaşdırdı, xalqımıza, ölkəmizə Böyük Qələbə bəxş etdi. Bu qələbənin baş qəhrəmanı Azərbaycan Respublikasının Prezidenti, Müzəffər Ali Baş Komandan, türk dünyasının görkəmli dövlət və siyasi xadimi İlham Heydər oğlu Əliyevdir.

Bu sözləri AZƏRTAC-ın bölgə müxbirinə müsahibəsində Lənkəran Dövlət Universitetinin müəllimi, filologiya elmləri doktoru, professor, Azərbaycan Yazıçılar Birliyinin üzvü Yədulla Ağazadə söyləyib.

Dünya gücləri qarşısında məğrurcasına duruş gətirərək, erməni yalanlarına təmkinlə, həm də tutarlı arqumentlərlə cavab verməsini, silahlı qüvvələri, ordunu yüksək döyüş hazırlığına gətirərək döyüş ruhunu qaldırmasını, müharibənin gedişində dəmir intizam yaratmağa nail olmasını, xalqın bütün təbəqələrini öz ətrafında yumruq kimi birləşdirməsini Azərbaycan Prezidentinin tarixi uğuru kimi dəyərləndirən professor, 44 günlük Azərbaycan həqiqətlərinin iki əsrlik erməni yalanlarını alt-üst etdiyini diqqətə çatdırıb.

O deyib: “Dünya Prezident İlham Əliyevin şəxsində, simasında Azərbaycanı sanki yenidən tanıdı, ermənilərin, onun havadarlarının ölkəmiz, xalqımız üzərinə çəkdiyi yalan, böhtan pərdəsini gördü və buna inandı. Müzəffər Ali Baş Komandan bir çoxlarına hərb, siyasət və dövlətçilik dərsi keçdi, müsahibələri ilə bunu bir daha təsdiq etdi. Azərbaycan xalqı öz rəhbəri ilə sonsuz qürur duyur, onunla fəxr edir!

44 günlük Vətən müharibəsi əyilmiş qəddimizi, zədələnmiş qürurumuzu yüksəklərə qaldırdı. Şəhidlərimiz, qazilərimiz müqəddəs qanlarıyla Azərbaycan hərb tarixinə yeni səhifələr yazdılar...”.

Y.Ağazadə daha sonra deyib: “44 günlük Vətən müharibəsinin ilkin nəticələrindən biri də bizi Böyük Qələbəyə aparan, bütün dünyaya nümunə olan milli birliyimiz, milli həmrəyliyimizdir. Müharibənin gedişində nəyin şahidi olduq? Uşaqdan böyüyə hamı saatlarla şəhidinin gəlişini intizarla, həm də sonsuz qürurla gözləyir, şəhid balasını son mənzilə ehtiramla, coşqu ilə yola salırdı. “Qarabağ Azərbaycandır!”, “Şəhidlər ölməz-Vətən bölünməz!” sədaları hər birimizi Vətən uğrunda, Qarabağ uğrunda müqəddəs savaşa çağırırdı...

Vətən müharibəsi bizə həqiqi dostlarımızı, həmçinin bədxahlarımızı bir daha yaxından tanıtdırdı. Bütün bunlardan sevinməmək, qürur duymamaq olurmu?! Söhbətimi Azərbaycan xalqının ümummilli lideri Heydər Əliyevin söylədiyi sözlərlə bitirmək istəyirəm: “Mən həmişə fəxr etmişəm, bu gün də fəxr edirəm ki, mən Azərbaycanlıyam!”

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.