Qəbələ, 20 aprel, Rəşad Türkoğlu, AZƏRTAC

Son illərdə ölkədə su ehtiyatlarından səmərəli istifadənin və su təsərrüfatı obyektlərinin idarə olunmasının təkmilləşdirilməsi, müasir tələblərə cavab verən meliorasiya və su təsərrüfatı obyektlərinin qurulması, eləcə də bu sahədə uçot və nəzarətin təkmilləşdirilməsi istiqamətində ardıcıl tədbirlər görülür. Bununla yanaşı, son dövrlərdə müşahidə edilən qlobal iqlim dəyişikliyi, dünyada orta temperaturun yüksəlməsi, əsasən qonşu ölkələrdən daxil olan yerüstü su ehtiyatının azalması, digər tərəfdən, suya tələbatın artması məhdud su ehtiyatlarına malik olan ölkəmizdə su ehtiyatlarının artırılması və sudan səmərəli istifadə üçün təxirəsalınmaz tədbirlər görülməsini zəruri edib.

AZƏRTAC xəbər verir ki, Prezident İlham Əliyevin “Yengicə su anbarının tikintisi haqqında” 2023-cü il 12 aprel tarixli Sərəncamına əsasən, ölkədə su ehtiyatlarının artırılması, əkinəyararlı torpaqların genişləndirilməsi, müasir təsərrüfatların yaradılmasının və əhalinin məşğulluğunun artırılmasının təşviqi üçün Qəbələ rayonunda Yengicə su anbarı tikiləcək.

Qəbələ Suvarma Sistemləri İdarəsinin sudan istifadə şöbəsinin rəisi Qurbanəli Daşdəmirovun sözlərinə görə, anbarın ümumi su tutumu 17,5 milyon kub, istifadə olunan həcmi isə 12,4 milyon kub nəzərdə tutulub. İki dağın arasında, çayın hövzəsində qurulacaq bəndin ümumi uzunluğu 449,5 metrə, hündürlüyü isə 45 metrə çatacaq. Bəndin üst hissəsinin eni 10 metr, su anbarının güzgü səthi isə 130 hektar təşkil edəcək.

Anbar tikilib istifadəyə verildikdən sonra 15 kəndin ərazisində yaşayan 3 minə yaxın fermer təsərrüfatının su təminatı tamamilə yaxşılaşacaq. Ümumilikdə su anbarı tikildikdən sonra Qəbələnin aran hissəsində 10 min hektar sahənin suvarılması tam təmin olunacaq. Bu isə həmin torpaqlarda məhsuldarlığı artırmaqla yanaşı, ildə 2-3 dəfə əkin aparmağa imkan verəcək.

Yengicə su anbarı texniki quruluşuna və yerləşdiyi relyefə görə ekoloji baxımdan digər göllərdən daha sərfəli və səmərəli olacaq.

Anbarın yerləşdiyi ərazinin ekologiyasına heç bir zərər verilməyəcəyinə diqqət çəkən Qəbələ Suvarma Sistemləri İdarəsinin rəsmisi bildirib ki, rayonda bütün çaylar başlanğıcını dağlardan götürdüyü üçün suyun miqdarı dağlara yağan qardan asılı olur. İsti keçən yay mövsümündə, təxminən bir ay müddətində Qəbələ rayonunun çaylarında su azlığı müşahidə olunur. Bu da suvarmanın istənilən səviyyədə aparılmasına imkan vermir. Ümumiyyətlə, Yengicə su anbarı tikildikdən sonra rayonda torpaqların ilboyu su ilə təminatında heç bir problem yaşanmayacaq.

“Qəbələdə belə bir su anbarının yaradılmasına çox ciddi ehtiyac var. Belə ki, kənd təsərrüfatına yararlı torpaq sahələrinin 20 min hektara yaxını suvarılan torpaqlardır. Qəbələdə bu torpaqların su təminatını yaradan çaylarımızın hamısı başlanğıcını dağlardan götürür. Onların birbaşa su təminatı demək olar ki, dağlardakı qar örtüyündən asılıdır. Buna görə də, iyul ayının ikinci yarısından başlayaraq avqust ayının sonuna qədər rayondakı çaylarda suyun səviyyəsi kəskin azalır və bu səbəbdən fermerləri istənilən səviyyədə su ilə təmin etməkdə çətinlik çəkirik. Yeni su anbarı bu çətinlikləri aradan qaldıracaq”, - deyə o əlavə edib.

Qeyd edək ki, Yenigcə su anbarının inşası ilə əlaqədar tikinti podratçı təşkilat da artıq müəyyənləşdirilib və bu günlərdə ərazidə su anbarının tikintisinə başlanılacaq. İki il ərzində anbarın əsas hissəsinin inşasının başa çatdırılması planlaşdırılır.