CƏMİYYƏT
Yeni Azərbaycan Partiyası Səbail rayon təşkilatında şanlı Qələbəmiz və YAP-ın yaranmasının 28-ci ildönümü qeyd olunub
Bakı, 21 noyabr, AZƏRTAC
Yeni Azərbaycan Partiyasının (YAP) Səbail rayon təşkilatında Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun İkinci Qarabağ müharibəsində qazandığı şanlı qələbələr və YAP-ın yaranmasının 28-ci ildönümü münasibətilə videoformatda konfrans keçirilib. Konfransda rayon şurası və idarə heyətinin üzvləri, partiya veteranları və fəal gənclər iştirak ediblər.
YAP Səbail rayon təşkilatından AZƏRTAC-a bildiriblər ki, əvvəlcə Prezident İlham Əliyevin Ağdam rayonunun işğaldan azad olunması münasibətilə xalqımıza müraciəti dinlənilib.
Videkonfransa sədrlik edən YAP Səbail Rayon Təşkilatının sədri Şəmsəddin Hacıyev Ali Baş Komandan başda olmaqla xalqımızı müstəqil Azərbaycanın hərb tarixinə qızıl hərflərlə əbədi həkk olunan Vətən müharibəsindəki şanlı qələbələr münasibətilə təbrik edib. Azərbaycanın ərazi bütövlüyü uğrunda qəhrəmancasına döyüşən və şəhid olan Vətənin qəhrəman övladlarının xatirəsi dərin ehtiramla anılıb, döyüşlərdə yaralanan hərbçilərimizə şəfa arzulanıb.
Ali Baş Komandan İlham Əliyevin rəhbərliyi ilə Azərbaycan Ordusunun zəfər tarixi yazdığını, yeni bir müharibə modelini təqdim etdiyini vurğulayan Ş.Hacıyev rəşadətli Ordumuzun 44 günlük qələbə salnaməsinin dövlətçilik tariximizin son yüz ildə ən qürurlu səhifəsi olduğunu xüsusi qeyd edib. Bildirilib ki, Azərbaycan xalqının milli oyanışı, özünəqayıdışı və fəxarət rəmzinə çevrilən İkinci Qarabağ müharibəsi ölkəmizdə olduğu kimi, bütün türk dünyasında da böyük ruh yüksəkliyi yaradıb. Xalqımız Prezidentimizin ətrafında sıx birləşərək əzəli düşmənimizin başını əzən “dəmir yumruğ”a çevrilib, Azərbaycanın haqq səsinin bütün dünyaya çatdırılmasına nail olunub. Bu qələbə ermənilərin uydurduqları yalanları, mifləri, “böyük Ermənistan” xülyalarını da darmadağın edib, onların faşist və terrorçu xislətini və bütövlükdə “erməniçilik” ideologiyasının əsl simasını dünyaya nümayiş etdirib. Vətən torpaqlarının mənfur düşmən tapdağından azad olunması və Azərbaycanın qətiyyətli, inamlı qələbəsi ilə yekunlaşan İkinci Qarabağ müharibəsi Azərbaycan xalqının qalib, müzəffər, qəhrəman xalq olduğunu bir daha sübut edib. Şəhidlərimizin, eləcə də mənfur ermənilərin Azərbaycan xalqına qarşı törətdikləri soyqırım qurbanlarının qisasının alınması və müstəqil Azərbaycanın ərazi bütövlüyünün parlaq zəfərlərlə bərpa edilməsini təmin edilib.
Ş.Hacıyev döyüş meydanında qələbə əzmini nümayiş etdirən Ordumuzun komandanlıq heyətini, Azərbaycan zabit və əsgərlərini təbrik edib. Bildirib ki, Azərbaycan əsgəri hərb meydanında şanlı bayrağımızı işğaldan azad olunan torpaqlarımızda yüksək fəxarətlə dalğalandırıb. Prezident İlham Əliyevin siyasi və diplomatik məharətinin nəticəsidir ki, noyabrın 20-də Ağdam rayonu heç bir güllə atılmadan işğaldan azad olunub. Qarabağ ətrafındakı yeddi rayonumuzun, Hadrutun və Şuşanın işğaldan azad olunması Müzəffər Ali Baş Komandanımızın dünya rəhbərləri qarşısında həm hərbi meydanda, həm informasiya məkanında, həm də siyasi və diplomatik arenada nümayiş etdirdiyi bilik və müdriklik nəticəsində mümkün olub. Sədr vurğulayıb ki, müharibə nəticəsində xalqımız Prezidentimizin qətiyyətinin, uzaqgörən strategiyasının və böyük komandan olduğunun bir daha şahidi olub.
Diqqətə çatdırılıb ki, bu Vətən müharibəsi Azərbaycan xalqına böyük mənəvi qazanclar bəxş edib. Eyni zamanda, erməni vandalizmini, əzəli düşmənimizin əsl terrorist, faşist iç üzünü dünyaya nümayiş etdirib. Qeyd olunub ki, bu taleyüklü günlərdə qardaş Türkiyənin mənəvi, siyasi dəstəyini, qardaş-dost Pakistanın və türk dövlətlərinin bu məsələdə ədalətli mövqeyini, Qoşulmama Hərəkatına üzv olan ölkələrin Azərbaycanı dəstəkləyən birmənalı mövqeyini biz heç vaxt unutmamalıyıq.
Azərbaycanda sarsılmaz xalq-iqtidar-ordu birliyinin mövcudluğunu vurğulayan Ş.Hacıyev bildirib ki, Azərbaycan üçün tamamilə yeni möhtəşəm dövr başlayır. İlham Əliyevin rəhbərliyi ilə Azərbaycan xalqı erməni vandallarının viran qoyduğu torpaqlarda mədəni irsimizi bərpa edəcək, kənd və şəhərlərimizi yenidən quracaq. Bu işlərdə Yeni Azərbaycan Partiyasının üzvləri də yaxından iştirak edəcəklər.
Ş.Hacıyev ulu öndər Heydər Əliyevin rəhbərliyi ilə qurulan və Azərbaycanın ictimai-siyasi həyatında əvəzsiz xidmətləri olan YAP-ın yaranmasının 28-ci ildönümü münasibətilə partiyanın bütün üzvlərini təbrik edib. Qeyd olunub ki, əgər 1990-cı illərin əvvəllərində ulu öndər Heydər Əliyev hakimiyyətə gəlməsəydi və onun xilaskarlıq missiyası olmasaydı, Azərbaycan xalqı üçün bugünkü bu qələbələr mümkün olmazdı. Ölkəmizdə ordu quruculuğunun bünövrəsi məhz Heydər Əliyev tərəfindən qoyulub. Ulu Öndərin davamçısı Prezident İlham Əliyevin ölkəyə rəhbərliyi dövründə görülən möhtəşəm işlərdə YAP-ın misilsiz xidmətləri olub. Şərəfli inkişaf yolu keçən partiya müstəqillik dövründə ölkəmizin ictimai-siyasi həyatında aparıcı rol oynayır, sıraları ildən-ilə genişlənir və YAP Cənubi Qafqazın ən mütəşəkkil siyasi qüvvəsinə çevrilib. Bu da təsadüfi deyildir, çünki hazırda partiyanın sədri Ali Baş Komandanımız İlham Əliyevdir. YAP üzvləri ölkəmizin ictimai-siyasi həyatında öz sözlərini bütün dövrlərdə deyiblər və bundan sonra da deyəcəklər.
Ş.Hacıyev YAP Səbail rayon təşkilatının fəaliyyəti, bu il pandemiya ilə mübarizə və müharibə dövründə görülən işlər haqqında konfrans iştirakçılarına məlumat verib. Qeyd olunub ki, xüsusi karanin rejimi dövründə Səbail rayonunda 200-dən çox aztəminatlı ailəyə xidmət göstərilib, maarifləndirmə işləri həyata keçirilib. Müharibə dövründə döyüşlərdə yaralanmış və hazırda müalicə olunan hərbi qulluqçular YAP tərəfindən xüsusi diqqətdə saxlanılıb, partiya üzvləri və könüllülər cəbhə bölgələrini ziyarət edib və Ali Baş Komandanımızla, ordumuzla həmrəylik nümayiş etdiriblər.
Sonda konfrans iştirakçıları Azərbaycan xalqını qələbələr münasibətilə bir daha təbrik ediblər.