CƏMİYYƏT
Yeni Azərbaycan Partiyası bundan sonra da Azərbaycanın inkişafında fəal iştirak edəcək
Bakı, 21 noyabr, AZƏRTAC
Azərbaycanın son illərdə qazandığı böyük nailiyyətlər ulu öndər Heydər Əliyevin yaratdığı və hazırda Prezident İlham Əliyevin sədri olduğu Yeni Azərbaycan Partiyasının (YAP) fəaliyyəti ilə bilavasitə bağlıdır. Tarixi zərurətdən yaranan partiya müstəqilliyimizin qorunması, dövlətçiliyimizin möhkəmləndirilməsi, iqtisadiyyatımızın inkişaf etdirilməsi və demokratiyanın yaranması və inkişafında mühüm rol oynayıb.
Bu fikirləri AZƏRTAC-a müsahibəsində YAP İcra Katibliyinin gənclərlə iş qrupunun rəhbəri Elmar Məmmədov deyib.
Elmar Məmmədov bildirib ki, müasir müstəqil Azərbaycanın şanlı siyasi tarixinin mühüm səhifələrindən birini məhz ümumxalq partiyası olan YAP-ın yaradılması təşkil edir. Bu mərhələni ona görə qürur və iftixar hissi ilə şanlı tarix adlandırırıq ki, Yeni Azərbaycan Partiyasının yaradılması ilə xaos və hərc-mərclik içində olan, vətəndaş müharibəsi və dünyanın siyasi xəritəsindən silinmək təhlükəsi ilə qarşı-qarşıya qalan Azərbaycanın xilasının, tənəzzüldən azad olaraq tərəqqi yoluna nail olmasının əsası qoyuldu.
Yarandığı gündən bu günədək müstəqil Azərbaycanın keçdiyi şanlı yolun böyük və əhəmiyyətli hissəsi bilavasitə Yeni Azərbaycan Partiyasının adı ilə bağlıdır. Əslində, YAP-ın 28 illik tarixi, müstəqil Azərbaycanın yeni tarixini əks etdirir. Çünki partiya yarandığı gündən ölkədə həyata keçirilən hüquqi dövlət, vətəndaş cəmiyyəti quruculuğu, demokratik inkişaf prosesində yaxından iştirak edib. Partiya müstəqil Azərbaycanın yüksəlişinə və tərəqqisinə töhfələrini əsirgəməyib. Zamanın sınaqlarından uğurla çıxan demokratik və sivil cəmiyyətdə xüsusi fəaliyyəti ilə seçilən YAP uzun və keşməkeşli yol qət edən və hazırda iqtidar partiyası kimi istər ölkə daxilində, istərsə də beynəlxalq aləmdə öz sözünü deyərək Azərbaycanın inkişaf və tərəqqisində nəhəng töhfələrini verməkdə davam edir. Xalqımızın mütləq əksəriyyəti YAP-ın avanqard rolunu, onun təkamül yolu ilə ölkəmizi uğurdan-uğura apardığını qəbul edir, bundan qürur duyaraq hər zaman ona dəstək verir. Təsadüfi deyil ki, Yeni Azərbaycan Partiyasının gücü bu gün Azərbaycanın milli gücü, qüdrəti kimi xarakterizə edilir.
“Təqdirəlayiq haldır ki, Yeni Azərbaycan Partiyası hər zaman gəncliyin inkişafına xüsusi diqqət yetirir. Bu gün ölkədə ən kütləvi və mütəşəkkil siyasi qüvvə olan YAP sıralarında 750 mindən artıq üzvü birləşdirir və çox sevindirici hal ondan ibarətdir ki, gənclər partiyaya üz tuturlar. Gənclərin axını partiyamızın gələcək inkişafı üçün də əsas şərtlərdən biridir. Həyata keçirilən bir çox layihələr, gənclərin tədbirlərinə dəstək verilməsi, onlar üçün geniş imkanların yaradılması buna əyani sübutdur. Təbii ki, partiyamızda gənclərin öz bilik və bacarıqlarının üzə çıxarılması üçün geniş imkanlar yaradılıb. Partiya rəhbərliyi intellektual, fəal gənclərin bir çox təşəbbüslərini dəstəkləyir və onların cəmiyyət həyatında daha fəal iştirak etməsi hərtərəfli dəstək göstərir. Bütün bunlara görə Azərbaycan gəncliyinin mütləq əksəriyyəti öz siyasi talelərini YAP-la bağlayırlar”, - deyə Elmar Məmmədov vurğulayıb.
O deyib ki, 28 ildə partiya uğurlu və şərəfli yol keçib. Bütün iştirak etdiyi seçkilərdə Yeni Azərbaycan Partiyası qələbə qazanıb və bu illər qələbələr salnaməsidir. Bu, təkcə statistika deyil, eyni zamanda, ölkə vətəndaşlarının Azərbaycan reallığına verdiyi qiymət və Prezident İlham Əliyevin həyata keçirdiyi uğurlu daxili və xarici siyasətə inamın ifadəsidir. Yeni zirvələr fəth edən Azərbaycanın hərtərəfli inkişafı, verilən hər bir vədin konkret əməli işdə öz təsdiqini tapması ildən-ilə xalq-iqtidar birliyini daha da möhkəmləndirib, vətəndaşların dövlətimizin başçısının ətrafında sıx birləşməsini təmin edib. Prezident, Yeni Azərbaycan Partiyasının sədri İlham Əliyev böyük fədakarlıqla və qətiyyətlə YAP-ın qurucusu Heydər Əliyev siyasi kursunu uğurla davam etdirərək Azərbaycan xalqına müraciətində də dediyi kimi, ata vəsiyyətini yerinə yetirdi. Onun son 17 ildə həyata keçirdiyi güclü dövlət, güclü ordu strategiyası nəticəsində işğalda olan torpaqlarımız azad edildi. Xalqın özünə inamını qaytardı.
“Bu gün hər bir azərbaycanlı əmindir ki, dövlətimizin başçısının “Bizim hamımızın məqsədi ondan ibarət olmalıdır ki, ölkəmizin maraqlarını müdafiə edək, ölkəmizi bütün bəlalardan qoruyaq, sabitliyi, inkişafı davam etdirək” strateji xətti qarşıdakı illərdə də Azərbaycanın dayanıqlı inkişafı üçün möhkəm zəmin yaradacaq. İnanırıq ki, Prezident, Yeni Azərbaycan Partiyasının sədri İlham Əliyevin rəhbərliyi ilə malik olduğu potensial, xalqın inamı, ideyalarının mükəmməlliyi sayəsində YAP bundan sonra da Azərbaycanın inkişafı və çiçəklənməsində daim fəal iştirak edəcək”? - deyə E.Məmmədov fikirlərini yekunlaşdırıb.