CƏMİYYƏT
Yeni Azərbaycan Partiyasının Gənclər Birliyi məlumatlandırma aksiyasını davam etdirir
Bakı, 27 oktyabr, AZƏRTAC
Yeni Azərbaycan Partiyasının (YAP) Gənclər Birliyi erməni təxribatçılarının törətdikləri iğtişaşlarla əlaqədar ABŞ, Rusiya, Britaniya, Almaniya kimi ölkələr daxil olmaqla 100-dən çox dövlət başçısının, beynəlxalq təşkilatların, Avropa və Asiya Parlamentinin deputatlarının, Xarici İşlər nazirliklərinin, beynəlxalq KİV-in e-mail ünvanlarına məlumat xarakterli çağırışlar göndərib.
YAP-ın mətbuat xidmətindən AZƏRTAC-a bildiriblər ki, məqsəd dünya ictimaiyyətini 30 ildir davam edən Ermənistan-Azərbaycan Dağlıq Qarabağ münaqişəsi barədə obyektiv məlumatlandırmaqdan ibarətdir.
E-mail məlumatlandırma aksiyası çərçivəsində YAP Gənclər Birliyi işğalçı Ermənistanın silahlı qüvvələrinin beynəlxalq hüququn norma və prinsiplərini, 1949-cu il Cenevrə konvensiyalarını və onların Əlavə protokollarını, habelə özlərinin israrlı xahişləri əsasında Moskvada keçirilmiş görüşün yekunu olaraq, razılaşdırılmış iki humanitar atəşkəs rejiminin, eyni zamanda, ABŞ-da imzalanmış yeni humanitar atəşkəs rejiminin tələblərini pozaraq, Gəncə, Mingəçevir şəhərlərinin, Tərtər rayonunun mərkəzi hissəsindəki yaşayış obyektlərini raket atəşinə tutması barədə məlumat xarakterli müraciətlər edilib. Müraciətdə ingilis dilində şüarlar, ermənilərin dinc sakinlərə hücumu nəticəsində həlak olmuş, yaralanmış körpələr, dağılmış mülki obyektlər barədə fikirlər əks edilib.
Bütün bu faktları əsas tutaraq, YAP Gənclər Birliyi müvafiq ölkələrin hüquq-mühafizə orqanları tərəfindən radikal erməni qruplarının törətdikləri vandalizm aktlarının araşdırılmasını və bu cinayətləri törədənlərin əməllərinə hüquqi qiymət verilməsini tələb edir.