İQTİSADİYYAT


Yeni Şəhərsalma və Tikinti Məcəlləsi müasir dövrün tələblərinə uyğunlaşdırılmışdır

Bakı, 24 dekabr (AZƏRTAC). Yeni Şəhərsalma və Tikinti Məcəlləsi Prezident İlham Əliyevin həyata keçirdiyi islahatlarının tərkib hissəsidir. Bu Məcəllə ölkəmizdə şəhərsalma və tikinti fəaliyyətinin hüquqi əsaslarını, prinsiplərini, eləcə də dövlət orqanlarının, fiziki və ya hüquqi şəxslərin bu sahədə səlahiyyət və vəzifələrini müəyyənləşdirəcəkdir.

AZƏRTAC-ın müxbiri hazırda aktual olan və böyük ictimai əhəmiyyət kəsb edən yeni Məcəllə ilə bağlı bəzi məqamları şərh etməyi Dövlət Şəhərsalma və Arxitektura Komitəsinin şöbə müdiri Cahangir Qocayevdən xahiş etmişdir. Komitə rəsmisi demişdir:

- Azərbaycanda şəhərsalmanın hüququ bazasını tənzimləyən bir sıra normativ-hüquqi aktlar, o cümlədən qanunlar (Şəhərsalmanın əsasları, Memarlıq fəaliyyəti haqqında, İnvestisiya fəaliyyəti haqqında və s.) mövcud idi. Amma son illərdə Bakı şəhərinin inkişafı, paytaxtda və eyni zamanda, regionlarda aparılan nəhəng tikinti-quruculuq işləri bu məsələlərə kompleks yanaşmanı tələb edirdi.

Digər tərəfdən, müstəqilliyimiz bərpa edildikdən sonra şəhərsalmanın normativ hüquqi bazasının yaradılmasında müəyyən milli ənənələri nəzərə almaq üçün belə bir sənədin işlənməsinə ehtiyac duyulmuşdur. Bu da bir həqiqətdir ki, əgər vaxtilə mövcud olan sənədlər daha çox keçmiş SSRİ qanunları ilə tənzimlənirdisə, müasir zamanda dünya təcrübəsindən faydalanmaq zəruriyyəti yaranmışdır. Yeri gəlmişkən, bir məsələni də qeyd edim ki, biz istər-istəməz gələcəkdə şəhərsalmanın inkişafında ötən illərin təcrübəsinə də diqqət yetirməliyik. Çünki bizim əksər rayon mərkəzlərində, şəhərlərimizdə və Bakıda müxtəlif təyinatlı iri obyektlər əsasən sovet dönəmində tikilmişdir. Birdən–birə bu prinsiplərdən uzaqlaşmaq faktiki imkan xaricindədir. Bu baxımdan 2013-cü ilin yanvarın 1-dən qüvvəyə minəcək Şəhərsalma və Tikinti Məcəlləsi bir çox yenilikləri ilə diqqəti cəlb edir. Şəhərsalma və Tikinti Məcəlləsində diqqət çəkən müddəalardan biri odur ki, əhalinin fərdi ev tikintisi üçün həyətində təsərrüfat binasının tikintisinə qadağalar demək olar ki, aradan götürülmüşdür. Bu, əhalinin həyat səviyyəsinin yaxşılaşdırılması, investisiya qabiliyyətinin artırılması üçün mühüm addımdır. Bununla da, Azərbaycanda fərdi mənzil tikintisinin sürəti artırılacaqdır.

Qanunvericilikdə xəbərdarlıq icraatı deyilən bir müddəa da vardır. Yəni, vətəndaş tərəfindən müvafiq yerli icra hakimiyyəti orqanına tikinti ilə bağlı müvafiq layihə təqdim olunur. Üç ay müddətində layihəyə dair bir irad olmasa, vətəndaş hündürlüyü 12 metrdən çox olmayan 3 mərtəbəli fərdi ev tikintisinə başlaya bilər. Bilirsiniz ki, ölkəmizdə korrupsiyaya qarşı ciddi mübarizə gedir, bütün sahələrdə şəffaflıq tələb olunur. Bu baxımdan qanunvericilikdəki belə bir dəyişiklik olduqca əhəmiyyətlidir.

Bir məsələyə də diqqəti yönəltmək istəyirəm ki, əgər hər hansı böyük ictimai əhəmiyyət daşıyan tikinti işləri gedirsə, yerli icra hakimiyyətləri bu barədə əhalini əvvəlcədən xəbərdar etməli olacaqlar.

Həmçinin qeyd edim ki, artıq bir çox şəhər və rayonlarda müvafiq abadlıq işləri aparılarkən, qanunvericiliyə görə belə layihələr Dövlət Şəhərsalma və Arxitektura Komitəsi ilə hökmən razılaşdırıldıqdan sonra həyata keçirilə bilər. Digər vacib məsələ ondan ibarətdir ki, tikinti obyektlərinin vahid reyestri aparılacaqdır. Belə ki, respublikada aparılan tikinti işlərinin komitədə vahid uçotu olacaqdır. Bütün məlumatlar yerli icra hakimiyyəti orqanlarından daxil olacaq və onların elektron bankı yaradılacaqdır. Bu, həm tikintinin layihə mərhələsinə nəzarəti asanlaşdıracaq, həm də tikintinin gedişinə, onun gələcəkdə istismarına, qəbuluna dair məlumatın alınmasına və lazımi tədbirlərin görülməsinə şərait yaradacaqdır.

Bundan əlavə, Məcəllədə şəhərsalmanın informasiya təminatı deyilən məfhum öz əksini tapmışdır. Hesab edirəm ki, bu, gələcəkdə nəinki tikinti sektorunun, eləcə də regionların idarə olunmasında çox mühüm əhəmiyyətə malik olacaqdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.