İQTİSADİYYAT
Yeni Suraxanı qəsəbəsində mərkəzi küçənin təmir işləri yekunlaşmaq üzrədir VİDEO
Bakı, 16 may, AZƏRTAC
Cari ilin “İnvestisiya Proqramı”na əsasən, Azərbaycan Avtomobil Yolları Dövlət Agentliyi tərəfindən Suraxanı rayonunun Yeni Suraxanı qəsəbəsində mərkəzi küçənin təmir işləri yekunlaşmaq üzrədir.
Agentliyin İctimaiyyətlə əlaqələr şöbəsindən AZƏRTAC-a bildirilib ki, uzunluğu 1300, eni isə 8 metr təşkil edən sözügedən küçə torpaq əsaslı olduğu üçün gediş-gəlişdə, xüsusən payız-qış mövsümündə problemlərə səbəb olurdu, hərəkətin rahat və təhlükəsizliyini təmin etmirdi. Məhz bu səbəbdən aparılan yenidənqurma işləri çərçivəsində küçəboyu zəruri yerlərdə yararsız qrunt qazılaraq çıxarılıb, əks-dolğu işləri aparılaraq yeni yol yatağının tikintisi və küçənin profilə salınması işləri görülüb, optimal qum-çınqıl qarışığından yol əsası işlənilib.
Yenidənqurma işləri çərçivəsində vətəndaşların yolun kənarı ilə rahat və təhlükəsiz hərəkətini təmin etmək məqsədilə küçədə 2240 poqonometr yeni piyada səkiləri inşa olunub.
“İnşaat Norma və Qaydaları”nın tələblərinə əsasən hazırda küçəyə ikiqat olmaqla yeni asfalt-beton örtüyünün döşənməsi işləri aparılır. Asfalt döşənən ərazilərdə isə kommunikasiya xətlərinə aid quyu qapaqlarının layihə hündürlüyünə qaldırılması işləri görülür.
Sözügedən küçədə təmir işləri 12 min kvadratmetrdən çox sahədə aparılır.
Cari ilin “İnvestisiya Proqramına”na əsasən təmir işləri Yeni Suraxanı qəsəbəsinin 14 iyul küçəsindən ayrılan və ümumi uzunluğu 1000 metr təşkil edən məhəllədaxili yollarında da aparılıb. Torpaq əsaslı yollarda artıq asfalt işləri icra olunaraq yekunlaşdırılıb.
Ümumilikdə, agentlik tərəfindən 2021-ci ildə Suraxanı rayonu ərazisində ümumi uzunluğu 18.5 kilometr olan küçə təmir edilib. 2022-ci ildə rayon üzrə təmir olunacaq küçə və yolların ümumi uzunluğu isə 12.5 kilometr təşkil edir.