DÜNYA


Yeni hesabat: ABŞ və Rusiya yenə ən böyük silah ixracatçısıdırlar

Bakı, 11 mart, AZƏRTAC

Stokholm Sülh Problemlərinin Tədqiqatı İnstitutunun (SIPRI) martın 11-də dərc olunmuş yeni tədqiqatının nəticələrində dünyada silah ticarətinin hazırkı vəziyyəti əks edilib. AZƏRTAC TASS agentliyinə istinadla xəbər verir ki, hesabatda 2014-2018-ci illərdə ABŞ və Rusiyanın ən böyük silah ixracatçıları olduqları qeyd olunub.

Sənəddə bildirilir ki, hesabat dövründə Rusiyanın silah ixracı 2009-2013-cü illərə nisbətən 17 faiz azalıb. Bunun əsas səbəbi Moskvanın Hindistan və Venesuelaya silah satışını azaltmasıdır. Rusiya hesabat dövründə 48 ölkəyə silah satıb və bu ticarətin 55 faizi Hindistan, Çin və Əlcəzairin payına düşür.

Bunun əksinə olaraq, ABŞ-ın silah ticarəti 29 faiz artıb. Əsas silahların satışı üzrə Birləşmiş Ştatlar Rusiyadan 75 faiz üstündür. Bu rəqəm ötən hesabat dövründə cəmi 12 faiz olub. Son 5 ildə Vaşinqton dünyanın 98 ölkəsinə silah satıb. Bunların əksəriyyəti yüksək texnologiyalı silahlar – hərbi təyyarələr, orta mənzilli qanadlı və ballistik raketlər, idarəolunan bombalardır.

Ümumilikdə isə, 2014-2018-ci illərdə silah ticarətində 7,8 faizlik artım qeydə alınıb. Ən böyük 5 silah ixracatçısı – ABŞ, Rusiya, Fransa, Çin və Almaniyanın payına ümumi silah tədarükünün 75 faizi düşür. ABŞ və Rusiya isə bu bölgüdə 57 faizlik paya sahibdirlər.

Ən çox silah alan isə Yaxın Şərq ölkələri – Səudiyyə Ərəbistanı, İraq, Misir, Qətər, İsraildir. Silah ixracatçıları arasında isə Almaniya və Fransanın ticarətinin həcmi müvafiq olaraq 13 və 43 faiz artıb. ən böyük artım Çinin silah ixracında olub (196 faiz). Cənubi Koreya, İsrail, Türkiyə də kiçik ixracatçılar arasındadırlar.

Hesabata görə, son 5 ildə silah idxalını ən çox artıran Səudiyyə Ərəbistanı olub (192 faiz).

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.