Bakı, 10 sentyabr, AZƏRTAC

Ölkəmizdə dövlət idarəçiliyinin optimallaşdırılması, şəffaflaşdırılması, operativliyinin və səmərəliliyinin yüksəldilməsi Prezident İlham Əliyev tərəfindən həyata keçirilən islahatların mühüm tərkib hissəsidir. Prezident Administrasiyasında, Milli Məclisdə, Nazirlər Kabinetində struktur islahatlarının reallaşdırılması, idarəçiliyin optimallaşdırılması və ölkənin uğurlu inkişafı üçün bu yaxınlarda Azərbaycan Respublikasının İqtisadi Şurasının, eləcə də Azərbaycan İnvestisiya Holdinqinin yaradılması da həyata keçirilən tədbirlərin əyani sübutlarıdır.

Bunu AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.

Müxtəlif vaxtlarda yerli və mərkəzi icra orqanlarının strukturu, fəaliyyət istiqamətləri, prinsipləri, vəzifə və öhdəliklərinin dəqiqləşdirilməsi, paralel idarəçiliyin aradan qaldırılması, qərarların çevik qəbul olunması və vəzifələrin mümkün qədər səmərəli icrası ilə bağlı qanunvericilik təşəbbüslərinin irəli sürüldüyünü deyən Sədaqət Vəliyeva bildirib: “Sirr deyil ki, islahatlar paketinin mühüm tərkib hissəsi kimi Milli Məclis, Prezident Administrasiyası, Nazirlər Kabinetində həyata keçirilən struktur dəyişiklikləri öz müsbət nəticələrini verir. Eyni zamanda, bu gün dövlət orqanlarının fəaliyyətində müşahidə olunan operativlik, ictimai rəyə, vətəndaşların problemlərinə həssas yanaşma, bürokratik əngəllərin, korrupsiya, rüşvətxorluq və digər mənfi hallara qarşı kəskin mübarizə əhali tərəfindən təqdir olunur, yeni idarəetmə fəlsəfəsi ictimai rəydə daha çox rəğbət qazanır. Bütün bunlar göstərir ki, qarşıdan gələn dövrdə də yerli və mərkəzi icra orqanlarının fəaliyyətinin optimallaşdırılması ilə bağlı tədbirlər davam etdiriləcək”.

Gəncə şəhəri Nizami və Kəpəz rayonları inzibati ərazi bölgüsünün ləğv edilməsi ilə bağlı irəli sürülən təşəbbüslərə münasibət bildirən Sədaqət Vəliyeva qeyd edib ki, bu, ölkənin ikinci böyük şəhərində idarəetmənin keyfiyyətinin yüksəldilməsi və vətəndaşların rahatlığının, məmnunluğunun təmin edilməsi məqsədi daşıyır. Çünki əhalisinin sayına görə Gəncə şəhərinə yaxın olan Sumqayıtın nümunəsi göstərir ki, idarəçiliyin bir mərkəzdən həyata keçirilməsi daha səmərəli və optimaldır. Əlbəttə ki, əgər vahid idarəçilik mexanizmi formalaşarsa, bundan, ilk növbədə, vətəndaşlarımız fayda görəcəklər. Yəni, vətəndaşların müraciətlərinə baxılma mexanizmi sadələşdiriləcək, onların problemləri daha çevik şəkildə həll olunacaq, idarəetmə sistemində çoxpilləlilik, paralellik, təkrarçılıq, bürokratiya, süründürməçilik və bu kimi digər mənfi hallar aradan qaldırılacaq, əhalinin sosial-mədəni və məişət ehtiyaclarının ödənilməsi, qanunçuluğun təmin edilməsi ilə bağlı qərarların icrasının səmərəliliyi daha da artacaq, böyük idarəetmə aparatı ləğv ediləcək və büdcə vəsaitlərinə qənaət olunacaq.

Sədaqət Vəliyeva diqqətə çatdırıb ki, Vergilər Nazirliyinin, Əmlak Məsələləri Dövlət Komitəsinin, Antiinhisar və İstehlak Bazarına Nəzarət Dövlət Agentliyinin İqtisadiyyat Nazirliyinin strukturuna daxil edilməsi bu sahədə idarəetmənin optimallaşdırılmasına xidmət etdi. Bu gün istər vergi, istərsə də iqtisadi sahədə vətəndaşların, xüsusilə də sahibkarların məmnunluğunu görməmək mümkün deyil.

Bu sahədə beynəlxalq təcrübəyə də toxunan Sədaqət Vəliyeva vurğulayıb ki, struktur islahatları dövrün tələbinə uyğun olaraq bir çox ölkələrdə aparılıb. Məsələn, Almaniyada Əmək Nazirliyi ilə İqtisadiyyat Nazirliyi birləşdirilib, ABŞ-da nazirliklərin fəaliyyətinin təkmilləşdirilməsi üçün müxtəlif xidmətlər yaradılıb, eyni zamanda, 22 xidməti özündə birləşdirən ABŞ Daxili Təhlükəsizlik Nazirliyi formalaşdırılıb. Bununla yanaşı, idarəçiliyin təkmilləşdirilməsi baxımından ABŞ-da müstəqil agentliklər, Britaniyada ictimai korporasiyalar, Fransada qərargahlar, Almaniyada supernazirlik təşkil edilib. Yəni, görünən odur ki, struktur islahatları, idarəçiliyin təkmilləşdirilməsi prosesi dünyanın inkişaf etmiş ölkələrində də müşahidə olunur. Bütün bunlar isə ölkənin ümumi inkişafına təkan verir.