REGİONLAR
Yeni ili Şamaxıda qarşılayacaq turistlər otellərdə yerlərin əksəriyyətini bron ediblər - REPORTAJ VİDEO
Şamaxı, 26 dekabr, Rəşad Türkoğlu, AZƏRTAC
Yeni il yaxınlaşdıqca bayram günlərini fürsət bilən yerli və əcnəbi turistlər bölgələrdəki istirahət mərkəzlərinə üz tuturlar. Türk dünyasının turizm paytaxtı seçilən Şamaxı da turistlərin ən çox axın etdiyi bölgələrdən biridir. Bayram günlərinə sayılı günlər qalmasına baxmayaraq, əksər yerlər artıq qonaqlar tərəfindən bron edilib.
AZƏRTAC-ın əməkdaşı Şamaxının otel və mehmanxanalarındakı vəziyyətlə maraqlanıb.
Gərgin iş həftəsinin yorğunluğundan, köhnə ilin ağırlığından azad olub dincəlmək, bayram günlərini yaddaqalan keçirmək istəyənlər ilsonu bölgələrimizə, o cümlədən Şamaxının gəzməli-görməli yerlərinə səfər edirlər. Şamaxının füsunkar təbiətini görmək, Azərbaycan mətbəxinin təamlarından dadmaq və mənalı istirahət etmək üçün rayona gələnlər istənilən büdcəyə uyğun istirahət növü seçə bilərlər. Qiymətlər isə hər istirahət mərkəzinin, restoran və otelin təklif etdiyi xidmətə əsasən dəyişir.
Otel təmsilçisi Adna Ağayev bildirir ki, çalışdığı istirahət mərkəzi Yeni ili qarşılamağa hazırdır. Müraciətlərə gəldikdə, qonaqların qeydiyyat prosesi çoxdan başlayıb: “Yerli və xarici qonaqlar tərəfindən otelimizin otaqlarının 50 faizi artıq bron edilib. Adi günlərdə otaqlarımızın qiyməti bir nəfər üçün 50 manat nəzərdə tutulurdusa, bayram günü üçün bu rəqəm bir nəfərə 100 manat təşkil edir. Qiymətlərin yüksəlməsinə səbəb otelimizdə qala gecəsinin təşkili, əyləncəli şou proqram, eləcə də milli və Avropa mətbəxinin təklif olunmasıdır”.
Qiymət artımının bayram günlərindəki xüsusi proqramla əlaqədar olduğu bildirilsə də, oxşar vəziyyət aşağı büdcəli otel və restoranlarda da yaranıb. Belə otellərdə digər günlərdə ikinəfərlik otaq 50-100 manat arasında dəyişirdisə, hazırda 100-200 manata təklif edilir. Xüsusi proqram tərtib edilən böyük otellərdəki qiymətlər isə adi gündəkindən dəfələrlə fərqlənir. Belə ki, bu otellərdə 200-250 manata olan ikinəfərlik otağın qiyməti 31 dekabr - 1 yanvar tarixlərində 1500-3000 arasında olacaq.
Yeni ili Şamaxıda qarşılamaq arzusunda olan qonaqların əksəriyyəti paytaxt Bakının payına düşsə də, əcnəbi turistlərin də sayı az olmayacaq.
Şamaxı Turizm İnformasiya Mərkəzinin rəhbəri Taleh Məmmədov deyir ki, Yeni ili Şamaxıda qarşılamaq istəyən xarici qonaqlar arasında ərəb və Avropa ölkələrindən, xüsusilə Türkiyə, Rusiya və Gürcüstandan gələnlər üstünlük təşkil edir. Otellərdə yerlərin əksəriyyəti artıq bron olunub. “Şamaxıda 21 mehmanxana və mehmanxana tipli obyekt fəaliyyət göstərir. Bunlardan 5-i otel, 16-sı istirahət mərkəzidir. Obyektlərlə yanaşı, turistlərə xidmət göstərən kənd evlərimiz də mövcuddur. Bu evlər Nağaraxana, Çuxuryurd, Avaxıl, Dəmirçi və Pirquluda, eləcə də digər yaxın kəndlərdə yerləşir. Şamaxıya gələn qonaqlar istənilən büdcəyə uyğun istirahət növü seçə bilərlər. Rayon ərazisində olan safari parkın, atıcılıq mərkəzinin, müasir otel və istirahət yerlərinin, qədim abidələrin qonaqların zövqünü oxşayacağına əminik”, - deyə o əlavə edib
Qədim tarixi, yüksək mədəniyyəti ilə hər zaman fəxr etdiyimiz, bir zamanlar Şirvanşahlar dövlətinin paytaxtı olan Şamaxıda qonaqlar bölgənin ləziz mətbəxini, sərin və saf bulaqlarını, əsrarəngiz gözəlliyə malik sıx meşələrini, qədim abidələrini, müasir üslubda inşa edilən istirahət mərkəzlərini görə biləcəklər.
Şamaxı turistlər üçün yaradılan şəraitlə yanaşı, həmçinin küçə və prospektlərində quraşdırılan al-əlvan bayram atributları ilə də bayrama hazırlaşıb. Şamaxı Rayon İcra Hakimiyyəti başçısının şəhər üzrə nümayəndəsi Asif Şirəliyevin sözlərinə görə, şəhərin girişində, eləcə də yeni salınmış dairəvi yolun ətrafında və Heydər Əliyev Parkında müasir işıqlandırma sistemlərindən istifadə edilməklə Yeni il atributları, müxtəlif dizaynda bəzədilmiş əyləncəli qurğular quraşdırılıb. Bu isə rayon sakinləri ilə yanaşı, qonaqların da zövqünü oxşayır.
Şəhərin bayram hazırlığından ürəkdolusu danışan Şamaxı sakini Pərvin Şirəliyeva al-əlvan bayram atributlarının insanların əhval-ruhiyyəsini daha da yüksəltdiyini vurğulayır: “Şəhərdə quraşdırılan attraksionlar xüsusilə uşaqların sevincinə səbəb olur, hər il onların sevimli şəkil çəkdirmə məkanına çevrilir. Bu ildən isə parkın ərazisində də quraşdırılıb. Düşünürəm ki, bu, həm uşaqların, həm də böyüklərin ürəyincə olan bir təşəbbüsdür”.
Qafqaz dağlarının cənub-şərq ətəklərində, dəniz səviyyəsindən 749 metr hündürlükdə yerləşən, tarixi və müasirliyi ilə vəhdət təşkil edən qədim Şamaxı hər zaman bura gələn qonaqların diqqət mərkəzində olub. Elə ona görə də, Xaqani Şirvani, İmadəddin Nəsimi, Seyid Əzim Şirvani, Mirzə Ələkbər Sabir, Abbas Səhhət kimi ədəbi simaları ilə tanınan Şamaxı, həm də 2023-cü il üçün türk dövlətlərinin turizm paytaxtı elan edilib.