CƏMİYYƏT


Yeni peşə və kvalifikasiya standartlarının layihələri hazırlanıb

Bakı, 2 iyul, AZƏRTAC

Əmək və Əhalinin Sosial Müdafiəsi Nazirliyində müvafiq sahələr üzrə işəgötürənlərin iştirakı ilə bir sıra yeni peşə və kvalifikasiya standartlarının layihələri hazırlanıb. Həmin layihələr “Bitki yağlarının istehsalı operatoru”, “Çörək və bulka məmulatının istehsalı üzrə maşın operatoru”, “Dəniz məhsulları emalı operatoru”, “Ət məhsullarının istehsalı operatoru”, “Konservləşdirilmiş meyvə-tərəvəz istehsalı operatoru” və “Pendir istehsalçısı, süd məhsulları istehsalı operatoru” peşələrini əhatə edir.

Nazirlikdə yaradılmış İctimai iaşə və qida sənayesində bacarıqların inkişaf etdirilməsi üzrə sahə komissiyasının videokonfrans formatında ilk iclasında həmin peşə və kvalifikasiya standartlarının layihələri müzakirə olunub.

Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, iclasda İqtisadiyyat, Təhsil, Kənd Təsərrüfatı nazirlikləri, Dövlət Statistika Komitəsi və Qida Təhlükəsizliyi Agentliyi, Peşə Təhsili üzrə Dövlət Agentliyi, Sahibkarlar (İşəgötürənlər) Təşkilatları Milli Konfederasiyası, Həmkarlar İttifaqları Konfederasiyası, Texnologiya və İqtisad universitetlərinin, habelə Milli Kulinariya Mərkəzi və bir neçə sahibkarlıq subyektlərinin nümayəndələri iştirak edib.

İclasda bildirilib ki, ölkəmizdə işçi qüvvəsinin rəqabət qabiliyyətliliyinin artırılması və iqtisadi inkişafın tələblərinə uyğunlaşdırılması, beynəlxalq standartlara cavab verən kadr potensialının formalaşdırılması dövlət məşğulluq siyasətinin prioritet istiqamətlərindəndir. Peşə və kvalifikasiya standartlarının hazırlanması və işəgötürənlərin istifadəsinə verilməsi də həmin məqsədə xidmət edən işlərdən biridir.

Müzakirələrdə peşə standartların məzmunu ilə yanaşı, layihələrdə əks olunmuş peşələr üzrə bilik və bacarıqlara, istehsalın inkişafı nəticəsində qeyd olunan sahələrdə yaranacaq yeni səriştələrə xüsusi diqqət yetirilib.

Müzakirələrin nəticəsi olaraq sahə komissiyası tərəfindən peşə və kvalifikasiya standartlarının layihələri məqbul hesab edilərək səs çoxluğu ilə qəbul edilib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.