MƏDƏNİYYƏT


Yeni salınan bağa “Heydər Əliyev və Mstislav Rostropoviç dostluq bağı” adı verilib

Bakı, 6 may, AZƏRTAC

Ümummilli lider Heydər Əliyevin anadan olmasının 99-cu ildönümü ilə əlaqədar mayın 6-da Leopold və Mstislav Rostropoviçlərin ev-muzeyinin təşkilatçılığı və Bakı Şəhər İcra Hakimiyyətinin tabeçiliyində olan Nərimanov rayon 5 saylı Yaşıllaşdırma idarəsinin dəstəyi ilə ağacəkmə aksiyası keçirilib.

AZƏRTAC xəbər verir ki, salınan bağa “Heydər Əliyev və Mstislav Rostropoviç dostluq bağı” adı verilib.

Ağacəkmə aksiyasında L. və M.Rostropoviçlərin ev-muzeyinin icraçı rəhbəri Günay Əliyeva, Nərimanov rayon 5 saylı Yaşıllaşdırma idarəsinin rəisi Aris Muxtarov və hər iki müəssisənin əməkdaşları, həmçinin KİV nümayəndələri iştirak ediblər.

Qeyd edək ki, Azərbaycan mədəniyyətinin inkişafinda Heydər Əliyevin rolu böyükdür. Azərbaycan mədəniyyətinin parlaq nümayəndələri daim Heydər Əliyevin timsalında özlərinə mənəvi dayaq tapmışlar. Hətta milliyyətcə azərbaycanlı olmayan, lakin Azərbaycan torpağında doğulan və onu dünyaya tanıtdıran istedadlar Heydər Əliyevin diqqətindən kənarda qalmamışdır. Belə insanlardan biri də həmyerlimiz M.Rostropoviç idi.

Heydər Əliyev və dünyaşöhrətli musiqiçi, əsl insani keyfiyyətlərə malik, vətəninə sadiq M.Rostropoviç kimi iki dahinin dostluğu, əməkdaşlığı həmişə Azərbaycan mədəniyyətinin inkişafına xidmət etmişdir. Maestronun Bakıya gəlişlərini nəzərdən keçirən zaman onun hər gəlişinin Azərbaycan mədəniyyətinə böyük töhfələr verdiyinin şahidi oluruq.

M.Rostropoviçi, həmçinin “xeyriyyəçi”, “təbiət mühafizi”, “Dünya vətəndaşı” da adlandırırlar. O, həyatını nəinki musiqiyə həsr edib, insanların onun yüksək istedadından həzz almasına imkan verib. Eyni zamanda, xeyriyyəçilik və ictimai fəaliyyətlə də məşğul olub. Maestronun həyatında xeyriyyəçilik böyük rol oynayıb. O, Amazon meşələrinin xilas edilməsində xeyriyyəçi kimi fəaliyyət göstərib, “Tropik meşə fondu”na vəsait toplanması, Heyvanların Rifahı Fondu və Nəsli kəsilməkdə olan Dəniz Heyvanları Fondu üçün vəsait toplamaq üçün xeyriyyə konsertləri verib. Maestro, həmçinin zəlzələ qurbanlarına, qaçqınlara, xərçəng xəstəliyinə tutulmuş uşaqlara kömək məqsədilə dünyanın müxtəlif ölkələrində bir çox xeyriyyə konsertləri ilə çıxış edib.

Bu gün bütün dünyanın örnək götürə biləcəyi bu iki şəxsiyyətin dostluğu, etdiyi yaxşı əməllər hələ də yaşayır. Heydər Əliyev söhbətlərində “Mən dostumuzun, həmyerlimizin Beynəlxalq nüfuza malik olmasına sevinirəm... Paris-Parisdir, Moskva-Moskvadır, Bakı isə bizim planetimizin, dahi insanın dünyaya göz açdığı məmləkətdir”.

L. və M.Rostropoviçlərin ev-muzeyi iki dahi şəxsiyyətin dostluğunu yaşatmaq, eyni zamanda, dahi musiqiçinin xeyriyyəçilik, təbiət mühafizi kimi ənənələrini davam etdirmək üçün bu layihəni təşkil edib. Aksiyanın keçirilməsində məqsəd, həmçinin ağac əkməklə ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltmək, bu cür ekoloji aksiyaların mütəmadi olaraq təşkili ilə ətraf mühitin mühafizəsinin vacibliyini insanların, xüsusilə gənc nəslin diqqətinə çatdırmaq və onları ekoloji problemlərə qarşı mübarizədə birgə fəaliyyətə səsləməkdir. Eləcə də insanlar arasında ekoloji mədəniyyətin və təbiətə qayğı hissinin güclənməsinə töhfə verməkdir. "Azərbaycan 2020: Gələcəyə baxış" İnkişaf Konsepsiyasının təsdiq edilməsi haqqında Azərbaycan Respublikası Prezidentinin verdiyi Fərmanda da yaşıllaşdırma işi mühüm bir vəzifə kimi önə çəkilib.

Ümid edirik ki, bu gün L. və M.Rostropoviçlərin ev-muzeyi tərəfindən əkilən hər bir ağac iki dahi insanın dostluq əlaqələrinin bariz nümunəsi kimi gələcək nəsillərə yadigar qalacaq, həm də paytaxt Bakı şəhərində ekoloji tarazlığın qorunmasında vacib rol oynayacaq.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.