REGİONLAR


Yeni texnologiya əsasında əkilmiş pambıq sahəsində dronla zərərvericilərə qarşı kimyəvi mübarizə aparılıb

Bakı, 10 iyul, AZƏRTAC

Aqrar Elm və İnnovasiya Mərkəzinin (AEİM) Bitki Mühafizə və Texniki Bitkilər Elmi-Tədqiqat İnstitutunun (BMTB ETİ) Ucarda yerləşən Şirvan Təcrübə Stansiyasında müasir texnologiya əsasında əkilmiş pambıq sahəsində növbəti lokal xarakterli kimyəvi mübarizə tədbiri həyata keçirilib.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, dron vasitəsilə aparılmış mübarizə sahədə müşahidə olunan mənənə və tor gənəsinin məhv edilməsi məqsədilə icra olunub.

AEİM-in direktoru İmran Cümşüdov, BMTB ETİ-nin direktoru Elçin Xəlilov və digər mütəxəssislərin iştirakı ilə aparılmış müşahidələr zamanı ziyanvericilərin aktivliyi təsdiq edilib və dron vasitəsilə effektiv kimyəvi mübarizə aparılıb.

Dron vasitəsilə sahənin zərərvericilərdən qorunmasının bir sıra müsbət üstünlükləri var. Ənənəvi mexaniki metodla müqayisədə bitkilər əzilərək zədələnmir, bütün sahə deyil, yalnız ziyanvericilərin sirayətləndiyi ərazilərə pestisid vurulur ki, bu da zəhərli dərmanların ətrafa yayılmasının qarşısını alır, ekoloji tarazlığı qoruyur. İqtisadi baxımdan isə istehsal xərclərini aşağı salır, eyni zamanda, əkin aparılmış sahəni tam görməyə imkan yaratmaqla suvarmanın, alaqların yayılmasının səviyyəsini müəyyən etməyə imkan verir.

Qeyd edək ki, Şirvan Təcrübə Stansiyasının əkin sahəsində bu ilin məhsulu üçün Çin texnologiyası əsasında 10, türk texnologiyası əsasında isə 8 hektar əkin aparılıb. Torpaqbecərmə işləri Çin Xalq Respublikasından gətirilmiş diskli maladan istifadə edilərək həyata keçirilib, çiyid səpini müasir texnologiya ilə hazırlanmış aqreqatla aparılıb.

Xatırladaq ki, ötən il çinli mütəxəssislərin iştirakı ilə 10 hektarda çiyid əkilmiş, aqrotexniki becərmələrin dəqiqliklə aparılması nəticəsində əkin sahəsində orta məhsuldarlıq 65 sentner təşkil edib. Bu il də sahələrdən yüksək məhsuldarlıq gözlənilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.