CƏMİYYƏT


Yetkinlik yaşına çatmayanlar arasında narkotik və psixotrop maddələrdən istifadə ilə bağlı analitik hesabat təqdim olunub

Bakı, 6 iyul, AZƏRTAC

İyulun 6-da Bakıda “Yetkinlik yaşına çatmayanlar arasında narkotik və psixotrop maddələrdən istifadə dərəcəsinin qiymətləndirilməsi üzrə analitik hesabat”ın təqdimatı keçirilib.

AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsinin (AQUPDK) mətbuat xidmətinin rəhbəri Teymur Məmmədov hesabat haqqında məlumat verərək onun dövlət komitəsinin sifarişi əsasında Vətəndaşların Əmək Hüquqlarını Müdafiə Liqası tərəfindən hazırlandığını diqqətə çatdırıb.

Ailə, Qadın və Uşaq Problemləri üzrə Dövlət Komitəsinin sədri Bahar Muradova bəşəriyyət üçün təhlükəli problem olan narkomaniyanın ciddi narahatlıq doğurduğunu və onun genişlənməsinin qarşısının alınmasının ciddi məsələlərdən olduğunu qeyd edib. Narkomaniya ilə mübarizə məsələsinin Azərbaycanın dövlət siyasətinin prioritet istiqamətlərindən biri olduğunu diqqətə çatdıran komitə sədri deyib: “Ölkəmizdə narkomaniya ilə mübarizə istiqamətində genişmiqyaslı tədbirlərin həyata keçirilir. Narkotik maddələrinin istifadəsinin artması həm də, paralel olaraq cinayətkarlığın artması deməkdir. Bu bəlaya düçar olan yeniyetmələrin ən azı üçdə ikisi narkotik vasitələrdən asılı vəziyyətə düşdükdən sonra bu və ya digər cinayət əməlləri törədərək cinayətkara çevrilirlər.

BMT-nin Narkotiklər və Cinayətlər İdarəsi tərəfindən 2021-ci il üzrə dərc edilmiş “Dünya Narkotik Hesabatı”nda qeyd edilir ki, hazırda dünyada 275 milyona yaxın insan müntəzəm olaraq narkotik vasitələrdən istifadə edir və bu, 2010-cu illə müqayisədə 22 faiz artım deməkdir.

Ötən il ölkəmizdə narkotiklərdən istifadə üzrə qeydiyyatda 34 min 602 nəfər olub. Bunlardan 566-sı qadın, 14 nəfəri isə yetkinlik yaşına çatmayanlar olub. 2021-ci ildə qeydiyyatda olan narkotik istifadəçisi sayı 34602 nəfər təşkil edib. bunlardan 566 nəfəri qadın, 14 nəfəri isə yetkinlik yaşına çatmayan şəxsdir”.

Bahar Muradova bildirib ki, narkomaniya ilə mübarizə istiqamətində ölkəmizdə dövlət proqramları və müxtəlif layihələr həyata keçirilir. 2007-2012–ci illər üzrə “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə Proqramı” və “2013-2018-ci illər üçün narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair Dövlət Proqramı”ndan irəli gələn vəzifələrin yüksək səviyyədə yerinə yetirilməsi istiqamətində mühüm işlər görülüb. Ölkəmizdə narkomaniya ilə mübarizə istiqamətində 2019-cu il ildə 2019-2024-cü illər üçün dövlət proqramı qəbul edilib.

“Dövlət komitəsi bu istiqamətdə üzərinə düşən işi layiqincə və məsuliyyətlə görməyə çalışır. Təkcə ötən il respublikanın 47 rayon və şəhərində ümumtəhsil məktəblərinin təlim-tərbiyə işləri üzrə direktor müavinləri, məktəb psixoloqları, valideyn komitəsinin sədrləri üçün bu istiqamətdə 84 təlim keçirilib və bu təlimlərdən də 2100 nəfərə yaxın iştirakçı faydalanıb. Ötən ildən komitənin təşkilatçılığı ilə Təhsil Nazirliyi və Səhiyyə Nazirliyi ilə birgə başlayan və bu gün də davam edən “Narkotiksiz həyat”, “Sağlam həyat tərzi”, “Ziyanlı vərdişlərin insan sağlamlığına təsiri”, “Ziyanlı vərdişlərin ailələrə təsiri”, “Həyatının memarı - Sən özünsən” mövzularında təlim və layihələrimiz bütün regionları da əhatə edib.

Azərbaycanda da yeniyetmələr və gənclər arasında narkotik və psixotrop maddələrdən istifadə hallarının yüksələn xətt üzrə artdığını və aktuallıq kəsb etdiyini nəzərə alaraq, komitə ilə “Vətəndaşların əmək hüquqlarının müdafiəsi liqası”nın birgə əməkdaşlığı çərçivəsində yetkinlik yaşına çatmayanlar arasında narkotik və psixotrop maddələrdən istifadə dərəcəsinin qiymətləndirilməsi məqsədilə hesabat hazırlanıb. Bu prosesə Səhiyyə və Daxili İşlər nazirlikləri və Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının nümayəndələri də cəlb olunublar”.

Komitə sədri vurğulayıb ki, narkomaniya ilə mübarizədə təkcə dövlətin deyil, qurumların, cəmiyyətin bir yerdə, yəni kompleks şəkildə işləməsi daha məqsədəuyğundur. Komitə sədri gəncləri bu zərərli vərdişlərdən uzaq olmağa çağırıb.

Milli Məclis sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli bildirib ki, Azərbaycan narkomaniya ilə mübarizə istiqamətində bütün beynəlxalq konvensiyalara qoşulub. Dövlətin siyasətinə uyğun olaraq hüquq-mühafizə orqanları, polis bu bəla ilə mübarizədə adekvat fəaliyyət göstərirlər.

Onun sözlərinə görə, elə məsələlər var ki, narkomaniya ilə mübarizədə qanunla tam tənzimlənməyib. “Uşaqlarımızı və gənclərimizi sosial şəbəkələr vasitəsilə zərərli vərdişlərdən çəkindirmək bizi narahat edən məsələdir. Narkomaniya ilə birlikdə mübarizə daha çox səmərə verir. İdmanın kütləviliyi artırılmalı, sağlam həyat tərzi vərdişləri aşılanmalıdır”, - deyə Əli Hüseynli vurğulayıb.

Daxili İşlər Nazirliyinin Baş Narkotiklərlə Mübarizə İdarəsinin rəisi İslam Hümbətov Daxili İşlər Nazirliyi narkotiklərin qanunsuz dövriyyəsinin qarşının alınması və əhalinin maarifləndirilməsi istiqamətində səmərəli iş aparır. Qeyd olunub ki, görülən tədbirlər nəticəsində bu il indiyə kimi narkotiklərin satışı üzrə 19 min cinayət hadisəsinin qarşısı alınıb. İslam Hümbətov aparılan maarifləndirmə işlərindən danışıb və bu istiqamətdə birlikdə mübarizənin əhəmiyyətini vurğulayıb.

Ailə, Qadın və Uşaq Problemləri üzrə Dövlət Komitəsinin yanında İctimai Şuranın sədri, Vətəndaşların Əmək Hüquqlarının Müdafiəsi Liqasının sədri Sahib Məmmədovun sözlərinə görə, narkomaniya ilə mübarizədə yetkinlik yaşına çatmayanlarla işləmək xüsusi və həssas yanaşma tələb edir. Bildirilib ki, ailələr bəzən övladlarının narkotiklərə aludə olduğunu gizlədirlər və təəssüf ki, bu da qarşısı alınmayan fəsadlara gətirib çıxarır.

Sahib Məmmədov vurğulayıb ki, narkomaniyanın qarşısının alınmasında birgə fəaliyyət mühüm şərtdir. Onun sözlərinə görə, uşaq və gənclərin idmana, sağlam həyat tərzinə cəlb edilməsi narkomaniya ilə mübarizədə ən yaxşı vasitədir.

Narkomaniya ilə mübarizədə yetkinlik yaşına çatmayanlarla iş prosesində üçbucaq səmərəliliyindən danışan Səhiyyə Nazirliyinin "Respublika Narkoloji Mərkəz"in psixoloqu Ramin Allahverdiyev narkomaniyaya, ümumiyyətlə zərərli vərdişlərə aludəçilik baxımından kimyəvi və qeyri-kimyəvi asılılıq faktorlarının olduğunu qeyd edib. “Statistika göstərir ki, zərərli vərdişlərə aludəçilik nöqteyi-nəzərindən 17-18 yaşarası çox həssas dönəmdir. Bu işdə ailə və sosial mühitin rolu son dərəcə mühümdür. Bir psixoloq kimi orta məktəblərdə narkotiklərlə bağlı maarifləndirmə işinin həssas müstəvidə aparılmasının vacibliyini qeyd etmək istəyirəm”, - deyə o qeyd edib. Onun sözlərinə görə, uşaq və gənclərin sağlam həyat tərzinə cəlb edilməsi zərərli vərdişlərdən çəkindirmə məsələsində əsasa vasitədir.

Tədbir müzakirələrlə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.