Yevlax, 11 aprel, Tahir Ağaməmmədov, AZƏRTAC

Regionların sosial-iqtisadi inkişafına dair Dövlət proqramlarının uğurlu icrası nəticəsində ölkəmizin bütün bölgələrində olduğu kimi, Yevlax rayonunun da iqtisadiyyatı dinamik inkişaf edib. Yevlax şəhərində və rayonun kəndlərində genişmiqyaslı yenidənqurma və tikinti-quruculuq işləri həyata keçirilib, yeni sənaye obyektləri yaradılıb, əhalini narahat edən problemlərin həlli və infrastruktur layihələrinin yerinə yetirilməsi sahəsində mühüm işlər görülüb. Dövlətimizin qayğısı və yevlaxlıların fədakarlığı sayəsində Yevlax şəhəri ölkəmizin ən gözəl, abad, səliqəli şəhərlərindən birinə çevrilib. Bu gün Yevlaxa gələnlər iqtisadi yüksəlişin, gözəlliyin və müasirliyin şahidi olurlar.

Kənd təsərrüfatı, qida və sənaye məhsulları istehsalına yönəldilən investisiyalar artıb

Rayonun iqtisadi yüksəlişində sahibkarlığın inkişafı, kənd təsərrüfatı, qida və sənaye məhsulları istehsalına yönəldilən investisiyaların çoxalması, yeni istehsal, emal və xidmət obyektlərinin tikilməsi mühüm rol oynayır. Son illərdə rayonda “Lalə-tekstil” MMC tikiş fabriki, “Dan” kərpic, “Gilan” dəri emalı, “Yevlax Qida” MMC zavodları, “Arfa” mebel fabriki, “Yevlax-Beton” ASC dəmir-beton zavodu, asfalt istehsal edən zavodlar, “Karvan–K” MMC konserv zavodu, “Azərtoxum” MMC toxum emalı müəssisəsi, Kolanı kəndində istixana kompleksi, Varvara balıqartırma və digər istehsal müəssisələri yaradılıb. Rayonda özəl sektorun inkişaf etdirilməsi sosial-iqtisadi inkişafı sürətləndirməklə məhsul istehsalını artırıb, bir sıra ərzaq məhsulları üzrə tələbatın yerli istehsal hesabına təmin olunmasına imkan verib, əhalinin məşğulluq probleminin həllində mühüm rol oynayıb. Təsadüfi deyil ki, 2003-2018-ci illər ərzində rayonda 14 min 958-i daimi olmaqla, 24 mindən çox yeni iş yeri yaradılıb.

Yevlax gözəlliyi ilə seçilən bir şəhərə çevrilib

Yevlax şəhərinə səfərlərinin birində ümummilli lider Heydər Əliyev "Mən Yevlaxı daha abad, daha gözəl görmək istəyirəm" arzusunu ifadə etmişdi. Aparılan genişmiqyaslı tikinti-quruculuq işləri nəticəsində Ulu Öndərin bu arzusu gerçəkləşib. Yevlax şəhəri abadlaşıb, gözəlləşib, siması tamamilə dəyişib. 

Şəhərin prospekt və küçələri müasir üslubda yenidən qurulub, yollara asfalt örtük salınıb, işıqlandırma sistemləri quraşdırılıb, binaların dam örtüyü dəyişdirilib, fasad hissəsi müasirləşdirilib. Şəhərin mərkəzində dahi rəhbərin abidəsi ucaldılıb, Heydər Əliyev Mərkəzi, Ulu Öndərin adını daşıyan saray, gənclər evi, elektron kitabxana, tarix-diyarşünaslıq muzeyi, xalq teatrı, şahmat məktəbi, məhdud fiziki imkanlı insanlar üçün Regional İnformasiya Mərkəzi, stadion, bayraq meydanı, avtovağzal kompleksi, Qarabağ müharibəsi əlilləri və şəhid ailələri üçün 116 mənzilli 5 ədəd çoxmərtəbəli yaşayış binası, Aqrar İnkişaf Mərkəzinin və İqtisadiyyat Nazirliyinin Aran Regional İdarəsinin inzibati binaları, həmçinin idarə, müəssisə və təşkilatlar üçün yeni inzibati binalar, onlarla təhsil və səhiyyə müəssisəsi tikilib istifadəyə verilib. Hava limanı və Səmədabad–Qaraməmmədli-Qaramanlı-Köyük avtomobil yolu yenidən qurulub. Yevlax şəhəri də daxil olmaqla, 45 yaşayış məntəqəsi qazlaşdırılıb.

Təkcə 2018-ci ildə Kür çayı üzərində dəmir yolu körpüsünün, Aran qəsəbəsində Ailə-Sağlamlıq Mərkəzinin binasının tikintisi başa çatdırılıb. Mingəçevir şəhəri-Bəhrəmtəpə avtomobil yolunun Yevlax rayonundan keçən Aran qəsəbəsi-Yevlax-Bərdə yolunadək olan hissəsi, Qoyunbinəsi-Hacımahmudlu-Qaramanlı kəndlərarası avtomobil yolu, Bakı-Ələt-Qazax avtomobil yolu üzərindəki körpü, 60 yerlik körpələr evi-uşaq bağçası istifadəyə verilib. Rayonun 12 kəndində meliorasiya işləri aparılıb. 2 nömrəli körpələr evi-uşaq bağçası, elektron kitabxana, şəhər yaradıcılıq mərkəzinin binası, Mədəniyyət Mərkəzinin və 12 yaşayış binasının dam örtüyü əsaslı təmir olunub. Yevlax şəhərinin Füzuli və Pişəvəri küçələrində abadlıq və əsaslı təmir işləri aparılıb.

Hazırda Kür çayı sahilində 5 ulduzlu hotelin, 12 saylı Ərazi Vergilər Departamentinin, doqquzmərtəbəli 45 mənzilli yaşayış binasının, data internet mərkəzinin tikintisi, Aran qəsəbəsindəki mədəniyyət evində əsaslı təmir və yenidənqurma işləri davam etdirilir.

Regionların inkişafını daim diqqət mərkəzində saxlayan Prezident İlham Əliyevin Yevlaxa 8 dəfə səfər etməsi, rayonun sosial-iqtisadi inkişafının sürətləndirilməsi barədə imzaladığı sərəncamlar şəhərin müasir inkişafının şərtləndirən əsas amillərdəndir. Dövlətimizin başçısının Yevlax rayon ictimaiyyəti ilə görüşü zamanı dediyi “Çox şadam ki, Yevlax çox sürətlə inkişaf edir və rayonun gələcək inkişafı ilə bağlı əlavə tədbirlər görüləcəkdir” sözləri yevlaxlıların qurub-yaratmaq həvəsini daha da artırıb.

Parklar və xiyabanlar şəhəri

Bir zamanlar şoran torpaqlarında bir ağacın yetişdirilməsi olduqca çətin olan Yevlaxı indi, yaşıllıqlar, park və xiyabanlar şəhəri adlandırmaq olar. Əhalinin istirahəti və ekoloji mühitin yaxşılaşdırılması məqsədilə rayonda geniş yaşıllaşdırma işləri aparılıb, 2 milyondan çox ağac, 3 milyondan çox gül və dekorativ kol əkilib, 12 park, xiyaban və istirahət bağı salınıb, fəvvarələr inşa edilib. Yevlax sakinləri asudə vaxtlarını rəngarəng, gül-çiçəklər və cürbəcür dekorativ ağacların bəzədiyi Heydər Əliyev xiyabanı, Nizami, Dostluq, Müstəqillik, Səməd Vurğun, Dədə Qorqud, Gənclik, Bələdiyyə və digər parklarda keçirir, istirahət edirlər.

Kür çayının sahilində inşa edilən bulvar kompleksi isə Yevlax sakinlərinin və şəhərin qonaqlarının ən sevimli istirahət guşəsinə çevrilib. Ərazisi 8,2 hektar, uzunluğu 2500 metr olan bulvar kompleksinin bir hissəsi estakadalarda Kür çayının üzərindədir. Bulvar kompleksində inşa edilən 22 ədəd fəvvarə və şəlalə bura gələnlərin zövqünü oxşayır. Bulvarda xidmət obyektləri, ana və uşaq otağı, uşaq əyləncə mərkəzi, idman meydançaları yaradılıb, çimərlik salınıb. Vətəndaşların gözəl istirahəti üçün burada axşamlar konsert proqramları, Kür çayında kater gəzintisi də təşkil edilir.

Məşhur “Ana kür” mahnısının bu misraları sanki Kür çayının və onun sahilindəki Yevlax şəhərinin bu gününə həsr olunub: “Mavi dastan Kür, sahilləri gülüstan Kür”.