Bakı, 21 iyul, Elvin Camalov, AZƏRTAC

Yusif Səfərov küçəsində nəqliyyatın sıxlığının aradan qaldırılması üçün təkliflər hazırlanıb.

AZƏRTAC xəbər verir ki, bu sözləri iyulun 21-də Bakı Nəqliyyat Agentliyinin Yol Hərəkətinin Təşkili şöbəsinin müdiri Tərlan Səfərov Yusif Səfərov küçəsində nəqliyyatın sıxlığı və problemin aradan qaldırılması ilə bağlı təqdimat zamanı deyib.

O bildirib ki, Heydər Əliyev prospekti ilə mərkəzi ərazini birləşdirən ən əhəmiyyətli yol - Yusif Səfərov küçəsində aparılan təmir və yenidənqurma işlərinə baxmayaraq, hələ də bu yolda nəqliyyatın hərəkətində sıxlıq müşahidə edilir. Yolların Optimallaşdırılması Layihəsi çərçivəsində Bakı Nəqliyyat Agentliyinin mütəxəssisləri Yusif Səfərov küçəsi ilə bağlı geniş təhlillər aparıb, yolda nəqliyyatın maneəsiz hərəkətinə səbəb olan problemlər müəyyən edilərək optimal həll yolları təklif edilib.

T.Səfərovun sözlərinə görə, təklif edilən həll yollarının əsas özəlliyi onların minimum xərclər hesabına başa gəlməsidir. Təkliflər hazırlanarkən diqqətdə saxlanılan digər vacib məqam isə Yusif Səfərov küçəsinə yaxın ərazilərin gələcək inkişaf planlarının nəzərə alınmasıdır. “Məhz bu həll variantının reallaşdırılması sayəsində biz Yusif Səfərov küçəsindən keçməklə şəhərə giriş-çıxışa imkan verən alternativ yollara malik səmərəli yol şəbəkəsinin qurulmasına nail olacağıq”, - deyə T.Səfərov bildirib.

“GEMMS” şirkətinin Beynəlxalq Məsləhətçi qrupunun eksperti Kostas Vouletakis bildirib ki, günün pik saatlarında Yusif Səfərov küçəsindən şəhər istiqamətində saatda 8500 avtomobil, əks istiqamətdə isə saatda 5000 nəqliyyat vasitəsi hərəkət edir. Yusif Səfərov və Afiyəddin Cəlilov küçəsi ilə şəhər istiqamətində hərəkət edən nəqliyyat vasitələrinin böyük əksəriyyəti (saatda 7500 avtomobil) yollarını Üzeyir Hacıbəyli küçəsi ilə davam etdirirlər ki, bu da adıçəkilən küçədə nəqliyyat sıxlığının yaranmasına səbəb olur. Siqnallaşdırma müddətləri tez-tez Nəqliyyatı İntellektual İdarəetmə Mərkəzi tərəfindən mexaniki qaydada dəyişdirilir (artırılır) və yaxud yol hərəkəti yol polisi əməkdaşları tərəfindən tənzimlənir, nəticədə Üzeyir Hacıbəyli küçəsi üzrə hərəkətə üstünlük verilir. Üzeyir Hacıbəyli küçəsində yaranan sıxlıq “domino effekti” nəticəsində bütün kəsişən və paralel küçələrdə problemlər yaradır.

K.Vouletakis qeyd edib ki, Yusif Səfərov küçəsinin Üzeyir Hacıbəyli küçəsi ilə kəsişməsində yerləşən geridönmə yerinin ləğv edilərək yerinin dəyişdirilməsi Nizami küçəsinin də əhəmiyyətini azaldıb. Belə ki, artıq şəhərdən çıxış məqsədilə Yusif Səfərov küçəsindən istifadə edən nəqliyyat vasitələri birbaşa Neftçilər prospekti vasitəsilə yola daxil olurlar ki, bu da pik saatlarda Yusif Səfərov küçəsi ilə Neftçilər prospektinin kəsişməsində nəqliyyat sıxlığının yaranmasına səbəb olur. Yeni təşkil edilən geriyədönmə yerində gözləmə ərazisinin az olması və geriyədönmə üçün xüsusi zolaqların olmaması digər nəqliyyat vasitələrinin hərəkətində maneələr yaratmaqla yanaşı, həm də hərəkət təhlükəsizliyini təmin etməyə imkan vermir.

“Günün pik saatlarında Yusif Səfərov küçəsi şimal istiqamətdə də nəqliyyat vasitələrinin sıxlığı müşahidə olunur. Bunun əsas səbəbi də Afiyəddin Cəlilov küçəsinin şimalında yerləşən ərazidən hərəkət edən nəqliyyat vasitələrinin Yusif Səfərov küçəsinə daxil olaraq geridönmə yeri vasitəsilə şəhər istiqamətində hərəkətlərini davam etdirmələridir. Bu axın artıq sıx olan Yusif Səfərov küçəsinin böyük hissəsi boyunca hər iki istiqamətdə mənfi şəkildə təsir edərək nəqliyyat vasitələrini uzun dairəvi hərəkətlər etməyə vadar edir. Uzun dairəvi hərəkətlər ləngimələrə, toqquşan axınlara, həmçinin yanacaq sərfiyyatının və tullantıların artmasına səbəb olur”, - deyə K.Vouletakis vurğulayıb.

Ekspertin sözlərinə görə, hazırda Afiyəddin Cəlilov küçəsindən Üzeyir Hacıbəyli küçəsi vasitəsilə şəhər mərkəzinə giriş istisna olmaqla, Yusif Səfərov küçəsinin iki tərəfi arasında birbaşa qoşulma yoxdur. Alternativ yolların olmaması Afiyəddin Cəlilov və Üzeyir Hacıbəyli küçələrində nəqliyyat şəraitini pisləşdirir, belə ki, hərəkətin intensivliyi yolun buraxma qabiliyyətindən yüksəkdir.

Yusif Səfərov küçəsində nəqliyyat axınının daha səmərəli paylaşdırılması, yeni alternativ yolların yaradılması məqsədilə Bakı Nəqliyyat Agentliyi və “GEMMS” şirkəti tərəfindən təkliflərlə bağlı videoçarx izlənilib. Bununla bağlı məlumat verilərək bildirilib ki, Yusif Səfərov küçəsində daha 2 kəsişmədə - Sabit Orucov küçəsi – Nizami küçəsi, 28 May küçəsi – Mehdi Mehdizadə küçəsi istiqamətində düzünə hərəkət təşkil edilməlidir.

Qeyd edilib ki, Mehdi Mehdizadə və Sabit Orucov küçələri səmərəli həndəsi xarakteristikalara malik olsalar da, onlar nəzərdə tutulduğundan az istifadə edilir, çünki nəqliyyat vasitələrinə şəhər mərkəzinə getmək üçün uzun dairəvi marşrutlar təklif edirlər. Bu kəsişmələr işıqforlar vasitəsilə idarə olunacaqlar ki, bu da Yusif Səfərov küçəsinin hər iki tərəfi arasında həm şəhər mərkəzinə giriş, həm də şəhər mərkəzindən çıxış üçün qısa və birbaşa keçid təmin edəcək, hər iki istiqamətdə intensivliyi azaldaraq Yusif Səfərov küçəsində uzun dairəvi marşrutları ləğv edəcək.

Daha sonra məlumat verilib ki, kəsişmələrin sinxronlaşdırılmış işıqforla idarə olunması ərazidə nəqliyyat sıxlığının yaranmasının qarşısını almaqla yanaşı, həm də Üzeyir Hacıbəyli küçəsində nəqliyyat axınının nizamlanmasına imkan verəcək. Nizami küçəsi ilə kəsişmədə piyadaların rahat və təhlükəsiz hərəkəti üçün nizamlanan piyada keçidinin təşkil edilməsi də nəzərdə tutulub. Eyni zamanda, qeyd edilən kəsişmələr Yusif Səfərov küçəsində mövcud geridönmə yerinin ləğv edilməsi, geridönmələrin bu kəsişmələr vasitəsilə həyata keçirilməsinə şərait yaradacaq.

“Bu kəsişmələrin təşkil edilməsi, həm də “Ağ Şəhər" layihəsini şəhər mərkəzi və Nəriman Nərimanov prospekti (Sovetski) ilə birbaşa birləşdirəcək əhəmiyyətli cüt dəhliz yaradacaq. Nəzərə alsaq ki, “Ağ Şəhər” layihəsi çərçivəsində qeyd edilən ərazidə 50 min sakinin məskunlaşacaq və 30 mindən çox nəqliyyat vasitəsinin gün ərzində bu ərazidən istifadə edəcək, bu, layihənin əhəmiyyətliliyini daha da artırır. Bu layihə Nəcəfqulu Rəfiyev küçəsini Babək prospektindən şəhər mərkəzinə və əks istiqamətdə əsas dəhlizə çevirəcək. Həmçinin Sabit Orucov və Mehdi Mehdizadə küçələrini isə müvafiq olaraq, Afiyəddin Cəlilov küçəsi və Neftçilər prospektinə paralel alternativlərə çevirəcək. Yuxarıda təsvir edilən işlər daha əlverişli yol şəbəkəsi təmin etməklə kifayətlənməyəcək, həm də “Ağ Şəhər” və Yusif Səfərov küçəsi arasındakı bütöv ərazinin xarakterini müsbət şəkildə dəyişəcək, sosial və biznes mühitin inkişafına təkan verəcək”, - deyə təqdimat zamanı vurğulanıb.