ZAQATALADA ÖZƏL TOXUMÇULUQTƏSƏRRÜFATLARI YARADILMIŞDIR

AZƏRTAC-ın müxbiri xəbər verir ki, Kənd Təsərrüfatı Nazirliyinin müvafiq razılıq-lisenziyasına əsasən, Zaqatala rayonunun “Göyəm” və “Muxax” istehsal kooperativləri, habelə Faldarlı-Qandax ərazisində fəaliyyətdə olan toxumçuluq müəssisəsi bundan sonra özəl toxumçuluq təsərrüfatları kimi fəaliyyət göstərəcəkdir. Bu təsərrüfatlar artıq dövlət qeydiyyatına alınmışdır.

Rayon icra hakimiyyətindən bildirmişlər ki, yeni yaradılan özəl toxumçuluq təsərrüfatları rayonun fermer təsərrüfatlarını yerli şəraitə uyğun yüksək məhsuldar və keyfiyyətli toxum sortları ilə təmin edəcək, habelə toxumçuluqla bağlı seleksiya işlərinin aparılmasında Zaqatala Bölgə Təcrübə Stansiyasına yaxından kömək göstərəcəkdir.