ZƏRİFƏ SALAHOVANIN YUBİLEYİ QEYD EDİLMİŞDİR
AZƏRTAC xəbər verir ki, fevralın 2-də Miniatür kitab muzeyində Azərbaycan “Kitab” Cəmiyyətinin sədri Zərifə Salahovanın yubileyi qeyd edilmişdir. Elm, ədəbiyyat, mədəniyyət və incəsənət xadimləri, müxtəlif təşkilatların təmsilçiləri, diplomatik korpusun nümayəndələri səhər saat 11-dən axşam saat 19-dək buraya gələrək tanınmış ictimai xadimi yubileyi və “Şöhrət” ordeni alması münasibətilə təbrik etmişlər. Xatırladaq ki, Zərifə xanım yüksək dövlət mükafatına - “Şöhrət” ordeninə kitab mədəniyyətinin inkişafındakı xidmətlərinə görə layiq görülmüşdür.
Miniatür kitab muzeyi Zərifə xanımın şəxsi kolleksiyası əsasında 2002-ci ildən fəaliyyət göstərir. Burada müxtəlif əsrlərdə 62 ölkədə, o cümlədən Azərbaycanda nəşr olunmuş 5 mindən çox kitab toplanmışdır. Hər gün bu kitab məbədinə 150-200 adam gəlir. Bir çoxları belə ziyarətlərdən sonra şəxsi kolleksiyalarından muzeyə pay verirlər. Buradakı kitabların ən kiçiyi 2 mmx2 mm, ən böyüyü 100 mmx100 mm-dir. Muzey son illər Zərifə xanımın Azərbaycan dövlətçiliyi ilə bağlı dərc etdirdiyi miniatür kitablar hesabına xeyli zənginləşmişdir.
Gün ərzində Bakı Şəhəri İcra Hakimiyyətinin başçısı Hacıbala Abutalıbov, Azərbaycan Yazıçılar Birliyinin sədri, xalq yazıçıları Anar, Çingiz Abdullayev, akademik Ömər Eldarov, mədəniyyət nazirinin müavini Sevda Məmmədəliyeva, Bakı Musiqi Akademiyasının rektoru, xalq artisti Fərhad Bədəlbəyli, xalq artistləri Fidan və Xuraman Qasımova bacıları, xalq artisti İlhamə, Çin Xalq Respublikasının ölkəmizdəki səfiri Çjan Xayçjou, Bolqarıstan səfirinin xanımı və başqaları yubilyarı səmimi təbrik etmişlər. Əməkdar artist Aygün Bəylər dünyada oxşarı olmayan miniatür kitab muzeyinin yaradıcısını mahnılarla salamlamışdır.
Azərbaycan xalçası və xalq tətbiqi sənəti Dövlət muzeyinin direktoru Röya Tağıyeva Zərifə Salahovaya Beynəlxalq Muzeylər Şurasının (İCOM) diplomunu təqdim etmişdir.
Professor Fərhad Bədəlbəylinin sözlərinə görə, Zərifə xanımın gördüyü bu iş çox vacibdir. İçərişəhərdə belə bir ocağı yaratmaq hər kişinin işi deyil. Buraya biz tez-tez gəlirik. Zərifə xanım yubileyini də çox orijinal formada qeyd edir: gün ərzində vaxtın olanda gəl Nizaminin, Sabirin, Cavidin, Puşkinin, “əhatəsində” Azərbaycanımızın “qaymaqları” ilə səmimi ünsiyyətdə ol. Formallıqdan uzaq, uzun nitqlərsiz. Zərifə xanımı ürəkdən təbrik edirəm.
Akademik Ömər Eldarov bu kitab məbədini nadir bir məkan adlandırır. Deyir ki, mən çox yer gəzmişəm, amma belə bir ocaq görməmişəm. Zərifə xanımı çoxdan tanıyıram. Çox enerjili və ünsiyyətcildir. Onu yubileyi münasibətilə səmimi təbrik edirəm.