REGİONLAR
Zaqatala Rayon MKS-nin təşkil etdiyi müsabiqələrin qalibləri müəyyənləşib
Zaqatala, 17 dekabr, Mustafa Dadaşov, AZƏRTAC
Zaqatala rayon Mərkəzləşdirilmiş Kitabxana Sisteminin (MKS) 2021-ci ilin “Nizami Gəncəvi İli” elan edilməsi ilə əlaqədar təşkil etdiyi “İncitək sözlər seç, dünya bəzənsin” adlı onlayn şeir və “Nizami Gəncəvi yaradıcılığında rəngarənglik” adlı onlayn rəsm, həmçinin 44 günlük Vətən müharibəsindəki tarixi Qələbənin ildönümü münasibətilə keçirdiyi “Zəfər yolu” adlı inşa yazı, “Zəfərin rəngi” adlı rəsm və “Zəfər səsi” adlı onlayn şeir müsabiqələrinə yekun vurulub.
Bu barədə AZƏRTAC-ın bölgə müxbirinə Zaqatala Rayon MKS-dən məlumat verilib.
Müsabiqə qaliblərinin mükafatlandırılması münasibətilə dekabrın 17-də rayon Mərkəzi Kitabxanasında tədbir keçirilib. Tədbirdə Zaqatala Rayon MKS-nin direktor əvəzi Leyla Məmmədova çıxış edərək, müsabiqələrin şərtləri və yekunları barədə məlumat verib. Bildirilib ki, müsabiqələrin hər birinə oxucular tərəfindən böyük maraq göstərilib. Müsabiqəyə təqdim edilən nümunələr peşəkar mütəxəssislərin daxil olduğu münsiflər heyəti tərəfindən dəyərləndirilib.
Yekun nəticələrə əsasən, “Zəfər səsi” adlı onlayn şeir müsabiqəsində Əliabad qəsəbə və Sumayılı kənd kitabxana filiallarının oxucuları Aylin Musayeva və Ramin Məmmədli birinci yerə layiq görülüblər. “Zəfərin rəngi” adlı rəsm müsabiqəsində Əliabad qəsəbə kitabxana filialının oxucusu Şahsənəm Balakişiyeva, “Zəfər yolu” inşa yazı müsabiqəsində isə Mərkəzi Kitabxananın uşaq şöbəsinin oxucusu Nuray Qardaşlı qalib gəliblər.
“Nizami Gəncəvi İli” çərçivəsində təşkil edilən onlayn şeir müsabiqəsində Hüri Məmmədova, onlayn rəsm müsabiqəsində isə Nailə Əhmədova birinci yerə layiq görülüblər.
Tədbirin sonunda müsabiqələrdə ilk üç yeri tutan iştirakçılara fəxri fərmanlar təqdim olunub.