Bakı, 20 oktyabr, AZƏRTAC

Vətən müharibəsinin 20-ci günündə qəhrəman Azərbaycan Ordusuzun Füzuli rayonunun mərkəzi ilə yanaşı, rayonun bir çox kəndinin Ermənistan ordusunun işğalından azad etməsi əks-hücum əməliyyatlarımızın daha geniş ərazilərdə, həm də paralel olaraq həyata keçirilməsi üçün münbit şərait yaratdı.

Bunu hərbi ekspert Ədalət Verdiyev AZƏRTAC-a açıqlamasında deyib.

Hərbi ekspert bildirib ki, Cəbrayıl rayonunda düşmən qüvvələrinə sarsıdıcı zərbələrin endirilməsi və rayonun 30-dan çox yaşayış məntəqəsinin işğaldan azad edilməsi Azərbaycan Silahlı Qüvvələrinin Zəngilan rayonunun inzibati hududlarında əməliyyatlara başlaması üçün şərait yaratdı. Cəbrayıldan sonra Azərbaycan Ordusunun hücumlarını Araz boyunca deyil, Füzuli və Hadrut istiqamətində davam etdirməsi həm düşmənin strateji yüksəkliklərdən, həm də mühüm təminat və təchizat bazalarından məhrum edilməsi ilə nəticələndi.

Füzuli rayonunun işğaldan azad edilməsindən sonra Dövlət Sərhəd Xidmətinin hissə və bölmələri Araz çayı boyunca sürətlə irəliləyərək oktyabrın 18-də Xudafərin körpüsü üzərində üçrəngli bayrağımızı dalğalandırdı. Oktyabrın 18-də, 19-da və 20-də Azərbaycan Ordusu Cəbrayıl istiqamətində çox ağır döyüşlər keçirdi. Cəbrayıl rayonunun bir çox kəndləri işğaldan azad olundu. Rayonun Əmirvarlı və Soltanlı kəndlərinin azad edilməsində daha qanlı döyüşlər oldu. Düşmən həmin ərazidə kifayət qədər ciddi müqavimət göstərdi. Ermənistan ordusunun bu ərazilərdə möhkəmləndirilmiş müdafiə rayonları və uzun müddətli atəş nöqtələri mövcud idi. “Ohanyan” müdafiə xəttinin bir çox elementlərinin dəfələrlə təkrarlanmısına da bu ərazilərdə rast gəldik. Əmirvarlı və Soltanlı kəndlərinin düşmədən təmizlənməsi ilə ordumuz düşməni yenidən qruplaşmaya keçməyə imkan vermədi. Qarşı tərəf müdafiəsinin təşkili üçün zaman əldə edə bilmədi. Silahlı Qüvvələrimiz geri çəkilən Ermənistan ordusunun hissə və bölmələrinin təqibini davam etdirərək oktyabrın 20-də Zəngilan şəhərini, həmçinin rayonun bir neçə kəndini işğaldan azad etdi.

“Zəngilan rayonu işğal edilərkən 1 şəhər, 5 qəsəbə və 79 kənddən ibarət olub. Vətən müharibəsinin başlanması ilə Silahlı Qüvvələrimiz tərəfindən Zəngilan şəhəri, rayonun 4 qəsəbəsi və 49 kəndi işğaldan tam azad edildi. Zəngilan şəhərinin işğaldan azad edilməyən digər kəndləri - 30-a yaxın kəndi və 1 qəsəbəsi isə noyabrın 10-da qüvvəyə minən üçtərəfli birgə Bəyanatın imzalanmasından sonra əraziyə yerləşdirilən Rusiya sülhməramlıları tərəfindən erməni silahlılarından təmizləndi və Azərbaycana qaytarıldı. Bu barədə bəyanatda heç nə yazılmayıb. Amma bunlar baş verən real proseslərdir. Anlaşılandır ki, bir səhifəlik bəyanatda əldə etdiyimiz uğurların bizə verəcəyi üstünlüklərin hamısını qeyd etmək mümkün deyildi”, - deyə hərbi ekspert əlavə edib.

Ə.Verdiyev bildirib ki, 27 il ərzində Ermənistan Zəngilanı işğal altında saxlamaqla həm bu və digər ərazilərdəki bütün təbii sərvətlərimizi talan edərək xarici ölkələrə ixrac edirdi. Əvvəl Cəbrayılın, sonra isə Zəngilanın azad edilməsi Azərbaycanın İran ilə sərhədlərinin bərpası ilə yanaşı, Qarabağdakı separatçı qurumun Araz üzərindən İran ilə ticarət münasibətlərinin qarşısının tam alınması ilə nəticəndi. Azərbaycan İran ilə sərhədlərini tamamilə bərpa etdi. Hazırda həmin ərazilərdə yeni qurulan hərbi hissələrimiz öz funksiyalarını uğurla həyata keçirirlər.

“Hazırda Zəngilan şəhərində Prezident İlham Əliyevin rayona səfəri zamanı təməl qoyulan beynəlxalq hava limanının inşası davam edir. Ümumiyyətlə Zəngilan rayonuna bütün istiqamətlərdə yeni magistral yollar çəkilir. Bu proseslər turizm və bölgənin inkişafında müsbət rol oynamaqla bərabər, həm də həmin ərazilərdə yerləşən hissə və bölmələrimizin təminat və təchizatında böyük əhəmiyyət daşıyacaq. Zəngilandakı hava limanına bütün növ təyyarələr, o cümlədən ağır hərbi yük təyyarələrinin qəbul edilməsi gözlənilir. İnşa edilən bu nəqliyyat infrastrukturu ümumilikdə şərqi Zəngəzur və Qarabağ iqtisadi rayonlarının təhlükəsizliyinin təmin olunmasında və Silahlı Qüvvələrimizin mümkün əməliyyatlar zamanı manevr imkanlarının artırılmasında çox böyük əhəmiyyət daşıyacaq”, - deyə Ə.Verdiyev vurğulayıb.