REGİONLAR


Zərdab: məhsul buraxılışının 52,3 faizi kənd təsərrüfatının payına düşür

Zərdab, 12 fevral, AZƏRTAC

Regionların sosial-iqtisadi inkişafına dair üçüncü Dövlət Proqramının yekun ili olan 2018-ci il Zərdab rayonu üçün uğurla başa çatıb. Keçən il rayon iqtisadiyyatının əsas sahələrində 131 milyon 161 min manatlıq məhsul istehsal edilib. Bu da əvvəlki ildəkindən 22 milyon 861 min manat və ya 21,1 faiz çoxdur. Buraxılan məhsulun 68 milyon 653 min manatı və ya 52,3 faizi bölgə iqtisadiyyatının aparıcı sahəsi olan kənd təsərrüfatının payına düşür.

AZƏRTAC-ın bölgə müxbiri xəbər verir ki, bu barədə fevralın 12-də Zərdabda 2018-ci ilin sosial-iqtisadi inkişafının yekunları və qarşıda duran vəzifələrə həsr edilən hesabat yığıncağında danışılıb.

Rayon icra hakimiyyətinin başçısı Lütvəli Babayevin məruzəsində, eləcə də çıxışlarda əvvəlcə rayon iqtisadiyyatının əsas sahəsi olan aqrar sektorun ayrı-ayrı sahələrində görülən işlərdən, əldə olunan uğurlardan danışılıb. Prezident İlham Əliyevin kənd təsərrüfatının inkişafı, xüsusən ixracyönümlü məhsulların istehsalı ilə əlaqədar verdiyi tövsiyə və tapşırıqların icrası istiqamətində konkret tədbirlərin görüldüyü diqqətə çatdırılaraq bildirilib ki, hesabat ilində mühüm strateji məhsul olan taxılçılıqda uğurlu nəticələr qazanılıb. Belə ki, 18 min 653 hektar sahədən 60 min 150 ton taxıl istehsal olunub ki, bu da rayon tarixində ən yüksək göstərici olmaqla, inişilkindən 1328 ton artıqdır. Ümumi məhsuldarlıq 32,2 sentner, adambaşına düşən taxıl 1 ton 29 kiloqram olub.

Hesabat ilində inişilkindən 800 ton çox olmaqla, 5000 tona yaxın pambıq istehsal edilib. Ötən il Kənd Təsərrüfatı Nazirliyi tərəfindən rayonun Çallı bələdiyyəsi ərazisində “P-Aqro” MMC-yə məxsus 4000 ton qəbul gücünə malik yeni pambıq qəbul məntəqəsi tikilib və fəaliyyətə başlayıb. 2018-ci ildə 1300 qutu (24700 qram) inkubasiya olunan ipəkqurdu toxumundan 53 ton 880 kiloqram barama istehsal edilib. Bu, respublikada ən yüksək göstərici olub.

Aqrar sektorun aparıcı sahələrindən olan heyvandarlıqda da nəticələr yaxşı olub. 204 hektar sahədən 939,4 ton çəltik, 201 hektardan 3870 ton kartof və digər məhsullar istehsal olunub. Rayonda arı ailələrinin sayı inişilkinə nisbətən 2 dəfə artaraq 1289-a çatıb.

Məruzə və çıxışlarda tikinti-quruculuq və abadlıq işləri, yol infrastrukturunun yaxşılaşdırılması, əhalinin içməli su ilə təminatı, məktəb tikintisi və təmiri, qazlaşdırma sahələrində həyata keçirilən layihələrdən, görülən işlərdən geniş bəhs olunub.

Cari ildə iqtisadiyyatın ayrı-ayrı sahələrində görüləcək işlər geniş müzakirə olunub, qarşıda duran konkret vəzifələrdən danışılıb.

Hesabat yığıncağında Prezident Administrasiyasının məsul işçisi Əlibaba Əliyev çıxış edərək, ölkəmizdə sosial-iqtisadi sahədə qazanılan uğurlardan, Prezident İlham Əliyevin rəhbərliyi ilə həyata keçirilən islahatlardan, qarşıda duran vəzifələrin həlli yollarından danışıb.

Yığıncaq iştirakçıları adından Azərbaycan Respublikasının Prezidenti İlham Əliyevə müraciət qəbul olunub.

Sonda Azərbaycan Respublikası Prezidentinin Sərəncamı ilə 2-ci dərəcəli “Əmək” ordeni ilə təltif edilən Namiq Aslanova orden təqdim edilib. Habelə, rayonun sosial-iqtisadi inkişafında fəal iştirak edən bir qrup şəxsə rayon icra hakimiyyətinin fəxri fərmanı və xatirə hədiyyələri verilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.