İQTİSADİYYAT


® AzMİU-da inşaatın bütün mərhələlərində rəqəmsal transformasiyaya həsr olunmuş beynəlxalq konfrans keçirilib

Azərbaycan Memarlıq və İnşaat Universitetində (AzMİU) inşaatın bütün mərhələlərində rəqəmsal transformasiyaya həsr olunmuş beynəlxalq konfrans keçirilib. Tədbirin təşkilatçıları “Trimble” (ABŞ) və “AZEL Systems” (Azərbaycan) şirkətləridir. 

Konfransın əsas məqsədi inşaat sahəsində aktual problemlərin və bu problemlərin real layihələr əsasında, inkişafa yol açan yeni texnologiyaların istifadəsi ilə mümkün həllərinin müzakirəsi idi. Eyni zamanda, “Tekla Trimble”nin mülki və sənaye inşaatı üçün təklif etdiyi imkanlar da diqqət mərkəzində olub.

Tədbiri giriş sözü ilə açan AzMİU-nun rektoru, professor Gülçöhrə Məmmədova konfransın əhəmiyyətini vurğulayaraq bildirib ki, müasir dövrdə informasiya texnologiyaları gündəlik həyatımızda, eləcə də ölkə iqtisadiyyatının bütün sahələrində çox böyük yer tutur.

Onun sözlərinə görə, bu texnologiyaların rolu ilbəil artmaqdadır və hər bir tələbə texnoloji biliklərə yiyələnməlidir.

Rektor yeni informasiya texnologiyaları ilə bağlı təşkil edilən konfransın universitet tələbələri və müəllimləri üçün stimul yaradacağına əminliyini ifadə edib.

Daha sonra “AZEL Systems” şirkətinin rəhbəri İqor Yakovenko təmsil etdiyi qurum barədə məlumat verib. Bildirib ki, 2013-ci ildə yaranan şirkət qabaqcıl texnologiyaların tətbiqi ilə məşğuldur. “Trimble” şirkətinin Azərbaycanda yeganə səlahiyyətli nümayəndəsi olan “AZEL Systems”, həmçinin dünyada tanınmış “Samsung”, “Autodesk” və digər şirkətlərin də tərəfdaşdır.

O qeyd edib ki, Azərbaycan şirkətləri yeni texnologiyaların mənimsənilməsi və tətbiqi sahəsində mühüm uğurlara nail olublar. Belə ki, “Azfen” şirkəti “Tekla Trimble” şirkətinin texnologiyası əsasında mühüm bir layihə həyata keçirib, bu da beynəlxalq səviyyədə yüksək qiymətləndirilib. “SOCAR Foster-Wheeler Engineering” şirkəti isə Heydər Əliyev adına neft emalı zavodunun rekonstruksiyası üzərində çalışarkən bütün işləri ən yüksək standartlara uyğun görüb.

İ.Yakovenko diqqətə çatdırıb ki, Azərbaycanın “Azfen” və “SOCAR Foster-Wheeler Engineering” şirkətləri yeni texnologiyaların yüksək səviyyədə tətbiqi sahəsində regionun lideri hesab edilirlər.

O əlavə edib ki, hər il 10-dək universitet tələbəsi şirkətdə təcrübə toplayaraq, qabaqcıl texnologiya sahəsində zəruri biliklər əldə edirlər. Hazırda isə onlar bacarıqlı mütəxəssislər qismində tanınmış şirkətlərdə çalışırlar.

Həmçinin bildirilib ki, “Tekla Trimble” şirkətinin tapşırığı əsasında “AZEL Systems” bu il 46 “Tekla” proqram təminatı lisenziyasını AzMİU-а pulsuz təqdim edib. Bir kommersiya lisenziyanın qiyməti isə 22 min avro təşkil edir.

“Tekla Trimble” şirkətinin MDB ölkələri üzrə kommersiya direktoru Denis Kuptsov “Tikinti sahəsinin rəqəmsallaşdırılmasında dünya trendləri, “BIM” texnologiyası və “Trimble” həlləri” adlı məruzə ilə çıxış edib.

Texnoloji tərəqqidən söz açan D.Kuptsov müasir dünyamızda bu inkişaf tendensiyasının artıq digər sahələrdə də, o cümlədən tibb, maşınqayırma, təyyarəqayırma, kino sənayesində müşahidə olunduğunu qeyd edib.

D.Kuptsov bildirib ki, Azərbaycanda belə bir “Trimble” konfransı ilk dəfə təşkil olunur. Buna baxmayaraq, Azərbaycan şirkətləri artıq uzun müddətdir həm ölkədə, həm də ondan kənarda “Trimble” həllərindən öz layihələrində istifadə edirlər.

“Biz rəqəmsal texnologiyaların inkşafı və onlara keçidin vacibliyini anlayan yerli mütəxəsislərlə dialoq qurmağı planlaşdırırıq”, - deyə məruzəçi vurğulayıb.

“Azfen” şirkətinin baş direktoru Həmid Həsənov bildirib ki, təmsil etdiyi qurum neft-qaz sənayesi sistemində artıq 22 ildir fəaliyyət göstərir.

Qeyd olunub ki, neftin və qazın dənizdən və ya qurudan çıxarılması, onların emalı, suyun yenidən yataqlara vurulması, eləcə də neftin təmiz halda Səngəçal terminalına nəql edilməsi yüksək texnologiyarın tətbiqinin nəticəsidir. Bu işlərin görülməsi isə az sayda mühəndis-texniki işçilərin cəlb olunması ilə başa gəlib. Odur ki, müasir texnologiyalara yiyələnmək, bu sahədə biliklər qazanmaq günün tələbidir.

“SOCAR Foster-Wheeler Engineering” şirkətinin baş direktoru Elməddin Dadaşov vurğulayıb ki, şirkət metal konstruksiyaların 3D modeldə yığılması üçün “Tekla Trimble” proqram təminatından istifadə edir. Şirkət, həmçinin Azərbaycanda yerli və xarici mütəxəssislərlə birgə bu proqram təminatından istifadə etməklə texnoloji qurğuların modelləşməsini həyata keçirir. Hazırda “SOCAR Foster-Wheeler Engineering” yalnız yerli deyil, həmçinin İtaliya və İspaniya şirkətləri ilə də əməkdaşlıq edir.

Tədbir iştirakçıları “Tekla Structures” və “Trimble SketchUP” proqramlarının tətbiqi və yeni layihələrə dair geniş təqdimatla çıxış ediblər.

Sonda “Tekla Trimble” şirkətinin kommersiya direktoru D.Kuptsov AzMİU-nun rektoru, professor G.Məmmədovanın iştirakı ilə tədbir iştrakçılarına fəxri sertifikatlar təqdim edib.

İlk öncə “SOCAR Foster-Wheeler Engineering” şirkətinin baş direktoru E.Dadaşov rəhbəri olduğu şirkətin 2017-ci və 2018-ci illərdə “Tekla Trimble” proqram təminatı istifadəsi ilə layihələndirmədə Cənubi Qafqaz regionu üzrə ən yaxşı nəticələrə nail olduğunu təsdiq edən sertifikat ilə mükafatlandırılıb. Daha sonra 2019-cu ildə analoji uğuru təkrarlayan “Azfen” şirkətinin baş direktoru H.Həsənova sertifikat təqdim edilib. Nəhayət, “AZEL Systems” şirkətinin son 3 ildə “Tekla Trimble”nin Cənubi Qafqaz regionu üzrə ən yaxşı strateji nümayəndəsi olmasını təsdiq edən sertifikat ilə şirkətin rəhbəri İ.Yakovenko təltif olunub.

Konfransın ikinci günü “Tekla Trimble” texniki mütəxəssisləri tərəfindən “Tekla Structures” proqram təminatının istifadəsi üzrə seminar-master klass keçirilib.

AzMİU-nun 50-dən çox tələbə və müəllimi master-klassda iştrak edib, rəsmi sertifikatlarla təltif olunublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.