“P&G”nin Avropa prezidenti Azərbaycan və Orta Asiya respublikalarının inkişaf imkanlarını Bakıda təsdiqləyib

“Procter & Gamble” şirkətinin Azərbaycanda 20 illik tədbirlərinə Bakıya səfər etmiş “P&G” Avropa idarə heyəti qatılıb. Şirkətin Avropa üzrə prezidenti Loik Tassel və idarə heyəti istehlakçılar, pərakəndəçilər, dövlət nümayəndələri və iri biznes sahibləri ilə görüşmək üçün Bakıda olublar. Səfərin məqsədini Azərbaycan biznes mühiti və imkanlarını dəyərləndirmək təşkil edib.

L.Tassel bildirib ki, bu, onun Azərbaycana ilk səfəridir və ölkənin sürətli inkişafı, iqtisadi imkanları onda xoş təəssüratlar yaradıb.

“Azərbaycan “P&G” üçün böyük əhəmiyyətə malikdir. Biz fəxr edirik ki, ötən 20 il ərzində Azərbaycan istehlakçılarına xidmət etmişik və hələ qarşıdakı uzun illər boyunca da “Ariel”, “Fairy”, “Gillette”, “Pampers”, “Always” kimi qlobal brendlərimizlə onların xidmətində duracağıq. Biz, həmçinin xoşbəxtik ki, istehlakçıların məhsullarımıza verdiyi qiyməti korporativ sosial məsuliyyət proqramlarımızla ictimaiyyətə geri qaytara bilirik. Azərbaycan Futbol Federasiyaları Assosiasiyası (AFFA) ilə tərəfdaşlığı, Bilikli Ana-Sağlam Körpə proqramını, “Always”in yeniyetmə qızlar üçün cinsi maarifləndirmə layihəsi, “Ariel”in geyim bağışlama kampaniyasını və bir sıra başqa fəaliyyətlərimizi bu işlər sırasında qeyd edə bilərəm. Biz “P&G” Bakı ofisi bazasında yaratdığımız iş imkanları və 600 nəfərədək insanı işlə təmin edən distribüterimiz “YOM” (Engin Şirkətlər Qrupu) kimi başlıca tərəfdaşlarımızla fəxr edirik. Biz onların regiondakı istehlakçılarımıza daha yaxşı xidmət göstərməyimizə imkan verən anbar və yayım sistemindəki yüksək bacarıqlarına və texnoloji inkişaflarına heyran qaldıq”, – deyə L.Tassel qeyd edib.

O, həmçinin yeni “P&G” bölümünün formalaşdırılmasının – “P&G” Türkiyə və Orta Asiya respublikalarında gözlənilən yeniliklərin anonsunu verib: “Mən bu ilin yanvarında Davosda Azərbaycan Prezidenti İlham Əliyevlə görüşmək şərəfinə nail oldum. Biz “P&G”nin Bakı ofisinin səlahiyyətlərinin genişlənmə imkanlarını müzakirə etdik. Öz heyətimlə Bakıya gəlib, “P&G” Bakı ofisinin səlahiyyətlərinin Türkmənistan, Özbəkistan, Tacikistan və Monqolustan respublikalarına genişlənmə xəbərini şəxsən özüm gətirməyə qərar verdim”.

“20 illik dayanıqlı inkişafın nəticəsində baş verən bu irəliləyiş bizim Azərbaycana verdiyimiz əhəmiyyəti sübut edir və istehlakçılarımıza xidmətdə davam edəcəyimizi göstərir. Biz Azərbaycan Prezidenti İlham Əliyevə ölkədə yaratdığı müsbət investisiya mühitinə görə dərin təşəkkürümüzü bildiririk” – deyə “Procter & Gamble” şirkətinin Avropa üzrə prezidenti L.Tassel bildirib.

“Procter & Gamble” (P&G) haqqında

“P&G” öz brendləri ilə dünyada təqribən 5 milyard insana xidmət göstərir. Şirkət “Pampers”, “Tide”, “Ariel”, “Head & Shoulders”, “Always”, “Pantene”, “Fairy”, “Blend-a-med”, “Oral-B”, “Gillette”, “Safeguard” kimi etibarlı, keyfiyyətli və qabaqcıl brendlərdən ibarət ən güclü məhsul çeşidlərinin birinə sahibdir. “P&G” icması dünyanın təqribən 70 ölkəsində fəaliyyət göstərir. “P&G” şirkəti və onun brendləri haqqında ətraflı məlumat almaq və ən son xəbərləri oxumaq üçün “www.pg.com” saytına baş çəkin.