® “League of Legends” turniri başa çatıb
Bakı, 14 dekabr, Nicat Məmmədov, AZƏRTAC
Gənclər və İdman, eləcə də Nəqliyyat, Rabitə və Yüksək Texnologiyalar nazirliklərinin, Azərbaycan Kiberidman Federasiyasının dəstəyi, ölkəmizdə kiberidmanın inkişafına töhfə verən “Gaming League Azerbaijan”ın (GLA) təşkilatçılığı ilə keçirilən “League of Legends” turniri başa çatıb.
AZƏRTAC xəbər verir ki, turnirdə üçüncü yer uğrunda görüşdə “TFB Esport” komandası “Aztelekom T1”ə 2:0 hesabı ilə qalib gəlib. Finalda “LGB” və “Incredible Miracle” komandaları üz-üzə gəliblər. Həlledici oyunda “Let’s Go Baron Tofiq” 2:1 hesabı ilə qalib gələrək çempionluq sevincini yaşayıb.
Qeyd edək ki, 2019-cu ilə qədər olan statistikalara görə, 400 milyondan artıq insanın marağını qazanan kiber idman sahəsinin populyarlığı bu gün də artmaqdadır. Kiber idman 2022-ci ildə baş tutacaq 19-cu Asiya Oyunlarının proqramına sınaq kimi daxil edilib.
Azərbaycanda 2019-cu ildə yaranmış və kiber idman turnirləri həyata keçirən GLA bu günədək 10-dan çox kiber idman çempionatı təşkil edib. Kiber idman mədəniyyətini inkişaf etdirmək məqsədilə yaradılan bu liqanın prioritet məqsədləri Azərbaycanda beynəlxalq səviyyədə idman oyunlarının inkişaf edilməsi, həm yerli, həm də beynəlxalq tədbirlərin keçirilməsi üçün lazımi şəraitin yaradılmasıdır.
Bölmənin digər xəbərləri
