İQTİSADİYYAT
® “Rabitəbank”ın əməkdaşları Boğaziçi Universitetinin “Menecmentin İnkişafı” proqramından məzun olub

“Rabitəbank” 150 illik təcrübəyə malik, beynəlxalq standartlara uyğun təhsil verən Türkiyə Universitetlərindən biri - Boğaziçi Universiteti ilə uğurlu bir layihəni başa vurub. Bankın müxtəlif rəhbər vəzifələrində çalışan 29 əməkdaşı 2,5 ay müddətində Boğaziçi Universitetinin Yaşamboyu Eğitim Mərkəzinin (BÜYEM) keçirdiyi “Leadership Academy of Business Program”da (mini MBA) iştirak edib. Bu müddət ərzində bank əməkdaşları universitetin professor-müəllim heyətindən biznesin idarə edilməsi və inkişafı yönündə təhsil alıb, imtahanlarda iştirak edərək layihəni uğurla başa vurublar.
Ötən günlərdə Bakıda layihəni uğurla tamamlayan bank əməkdaşlarının “Məzun Günü” tədbiri keçirilib. Layihəni yaxından izləyən “Rabitəbank”ın İdarə Heyətinin sədri Aydın Hüseynov, tədbirdə proqramın əhəmiyyətindən danışıb və iştirak edən bütün bank əməkdaşlarına uğurlar diləyib. Aydın Hüseynov, həmçinin tədbirdə əməkdaşların şəxsi inkişafı üçün təhsilyönümlü layihələrin davamlı olacağını vurğulayıb. “Rabitəbank” öz insan kapitalının inkişafı üçün davamlı investisiyalar edəcək. Daha sonra əməkdaşlar BÜYEM-in tədrisçiləri tərəfindən diplomla təltif olunub və tədbirin digər hissəsi iştirakçıların qazandıqları bu dəyərli təcrübəni qeyd etmələri ilə sonlanıb.
“Rabitəbank” ASC Azərbaycanın 16 regionu və Bakı şəhərində 27 xidmət məntəqəsi və 74 ATM-i, “Rabita Mobile” tətbiqi, İnternet Bankçılıq platforması və “RabitaBot” çatbotu, 133 nömrəli Çağrı mərkəzi ilə müştərilərin xidmətindədir.