İQTİSADİYYAT


"Azərenerji" ASC təcrübəli və gənc kadrlara şərait yaradır

Bakı, 4 yanvar, AZƏRTAC

"Azərenerji" ASC təcrübəli və gənc kadrlara şərait yaradır.

ASC-dən AZƏRTAC-a bildiriblər ki, "Azərenerji" ASC təcrübəli kadrların üzə çıxarılması, gənc mütəxəssislərin irəli çəkilməsi, işin operativliyini və keyfiyyətinin artırılması, o cümlədən yaxın zamanlara qədər enerjinin istehsalı, ötürülməsi və idarəolunması sahəsində yaşanan kadr pərakəndəliyinin kompaktlaşdırılması üçün bir neçə aydır sistemli şəkildə işlər həyata keçirir.

Belə ki, Azərenerji ASC-nin "İşə qəbul qaydaları" hazırlanaraq təsdiq edilib və "Mərkəzi Müsahibə Komissiyası" yaradılıb. "Azərenerji" ASC-nin elektrik stansiyalarında və yarımstansiyalarında kadr ehtiyatının yaradılması məqsədilə təcrübəli və gənc energetiklərin işə dəvət olunması üçün müxtəlif ixtisaslar üzrə Səhmdar Cəmiyyətin azerenerji.gov.az internet səhifəsində və KİV-lərdə elanlar yerləşdirilib.

Elanlar əsasında Səhmdar Cəmiyyətə 150-yə qədər müraciət daxil olub ki, həmin müraciətlər ehtiyat kadr bankına daxil edilib. Eyni zamanda, işə qəbul imtahanından keçən bakalavr və magistr təhsilli energetiklər hazırlıq kursu keçdikdən sonra elektrik stansiyalarına işə götürüləcəklər.

Bununla yanaşı, "Azərenerji" ASC-nin tabeliyində olan müəssisələrdə çalışan 800-ə yaxın işçi bilik səviyyəsinin yoxlanılması məqsədilə "Azərişıq" ASC-nin Tədris Mərkəzinin bazasından istifadə edilməklə imtahana cəlb edilib. İmtahandan əla və yaxşı qiymətlər alanlar Səhmdar Cəmiyyətin Texniki istehsalat, Mərkəzi dispetçer idarələrinə mühəndis, aparıcı mühəndis vəzifələrinə irəli çəkilib. Eyni zamanda, regional elektrik şəbəkələrinə və elektrik stansiyalarına məsul vəzifələrə təyin ediliblər. Yaxşı qiymət alan mütəxəssislərin bir hissəsi kadr ehtiyatı bankına daxil edilib və onların vəzifəyə yüksəlməsi, ödəniş dərəcələrinin artırılması üçün müəssisə rəhbərləri ilə birlikdə vakansiyalara təqdim olunması işləri aparılıb. İmtahandan kafi qiymət alan işçilərin isə ixtisaslaşdırma kurslarına cəlb olunması üçün qısamüddətli tədris proqramı hazırlanaraq həyata keçirilib.

"Azərenerji" ASC bundan sonra da həm qurum daxilində, həm də kənarda olan ixtisaslı mütəxəssislərin işə cəlb edilməsi, önə çəkilməsi və daha peşəkar formada yetişdirilməsi üçün səylərini durmadan davam etdirəcək.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.