İQTİSADİYYAT
"Bibiheybət" Gəmi Təmiri Zavodunda obyekt mülki müdafiə məşqi keçirilib
Bakı, 25 oktyabr, AZƏRTAC
Səbail rayon Fövqəladə Hallar (FH) və Mülki Müdafiə (MM) şöbəsinin 2018-ci il üçün mülki müdafiə tədbirləri planına əsasən, "Bibiheybət" Gəmi Təmiri Zavodunda (GTZ) "Fövqəladə hadisələrin nəticələrinin aradan qaldırılması zamanı MM orqan və qüvvələrinin idarə edilməsinin təşkili" mövzusunda məşq keçirilib.
"Azərbaycan Xəzər Dəniz Gəmiçiliyi" QSC-nin (ASCO) mətbuat katibliyindən AZƏRTAC-a bildirilib ki, məşqin keçirilməsində əsas məqsəd ehtimal olunan fövqəladə hadisələr zamanı onların nəticələrini aradan qaldırarkən ixtisaslaşmış dəstələrin funksional vəzifələrini yerinə yetirmələri üzrə nəzəri bilik və praktik vərdişlərini təkmilləşdirməkdən, fövqəladə hadisələrin qarşısının alınması işində təşkilatçılığın və operativliyin artırılmasından, hadisələri vaxtında proqnozlaşdırmaq, aşkarlamaq və qarşısını almaqdan, psixoloji təsirini neytrallaşdırmaq və zəiflətməkdən, müəssisə və obyektlərin sabit işləməsini təmin etməkdən və s. ibarət idi.
Məşqin keçirilməsinə Səbail rayon FH və MM şöbəsinin rəisi polkovnik-leytenant Nazir Əkbərov və şöbənin əməkdaşı kapitan Anar Nazıyev, FHN-in Bakı Regional Mərkəzinin əməkdaşları kapitan Cəsarət Kərimov və baş leytenant Osman Məmmədli, ASCO-nun məxfi rejim və mülki müdafiə şöbəsinin rəisi Rəşad Hüseynov, "Bibiheybət" GTZ direktorunun müşaviri Fuad Qurbanov və direktor müavini Namiq Nurməmmədov, zavodun fövqəladə hallar komissiyası, mülki müdafiə qüvvələrinin şəxsi heyəti və texnika cəlb olunub.
Məşq iki mərhələdə keçirilib. Birinci mərhələdə xəbərdarlıq və toplanış siqnalı verilib və inzibati binadan işçilərin təxliyəsi yerinə yetirilib. Direktor müşaviri Fuad Qurbanov iştirakçıları məşqin mövzusu, məqsədi və şərti olaraq baş vermiş fövqəladə hadisələr barədə məlumatlandırıb. Sonra Səbail rayon FH və MM şöbəsinin rəisi Nazir Əkbərov öz düşüncələrini iştirakçılarla bölüşərək bildirib ki, tədris edilən, praktiki öyrədilən bütün məşq və təlimatları diqqətlə öyrənmək olduqca vacibdir. Hər bir fövqəladə vəziyyətə hazır olmaq vətəndaşlıq borcumuzdur. Belə tədbirlər də iştirakçılara məhz bu amilləri aşılayır.
Məşqin ikinci mərhələsində fövqəladə hallar zamanı rəhbər heyətin mülki müdafiə qüvvələrini idarə etmək, düzgün qərarlar vermək bacarığı və eyni zamanda, fövqəladə hadisə baş vermiş ərazidə xilasetmə və digər təxirəsalınmaz işlərin aparılması bacarığı nümayiş etdirilib.
Baş vermiş fövqəladə hadisələr barədə kəşfiyyat məlumatlarına əsasən mülki müdafiə dəstələri xəsarət alanların təhlükəli ərazidən çıxarılması, ilk tibbi yardım göstərilərək şərti xəstəxanaya çatdırılması, fövqəladə hadisə baş vermiş ərazidə radiasiya dərəcəsinin müəyyən edilməsi və s. prosedurları əyani olaraq göstəriblər. Şərti törədilmiş yanğın yerinə yanğınsöndürmə dəstəsi cəlb edilib və yanğının qarşısı qısa zamanda alınıb. MM qərargah rəisi, MM qüvvələrinin komandirləri məşq vaxtı ərazidə fəaliyyətləri barədə məruzə ediblər.
Məşq praktiki tədbirlər yekunlaşdıqdan sonra başa çatıb və qənaətbəxş hesab olunub.