Bakı, 13 oktyabr, AZƏRTAC

Azərbaycanda spirtli içkilərin istehsalı ilə məşğul olan "NZS" şirkəti "Bir Pəncərə" İxraca Dəstək Mərkəzi vasitəsilə Çinə 21 070 kiloqram məhsul ixrac edib. Şirkətin müraciəti əsasında "Bir Pəncərə" İxraca Dəstək Mərkəzinə inteqrasiya olunan İqtisadiyyat Nazirliyinin nümayəndəsi ixracatçıya məhsulun mənşə sertifikatının verilməsini təmin edib.

Bu barədə AZƏRTAC-a bildirən İqtisadi İslahatların Təhlili və Kommunikasiya Mərkəzinin PR meneceri Zənurə Talıbova qeyd edib ki, prosedurların sadəliyinə və bütün sənədlərin bir məkandan qısa müddətdə verilməsinə görə "Bir Pəncərə" İxraca Dəstək Mərkəzindən istifadə edən sahibkarların sayı getdikcə artır.

Qeyd edək ki, "Bir Pəncərə" İxraca Dəstək Mərkəzi "Rəqəmsal Ticarət Qovşağı kimi Azərbaycan Respublikasının mövqeyinin gücləndirilməsi və xarici ticarət əməliyyatlarının genişləndirilməsi ilə bağlı əlavə tədbirlər haqqında" Azərbaycan Respublikası Prezidentinin 2017-ci il 23 fevral tarixli Fərmanı əsasında yaradılıb. "Bir Pəncərə" İxraca Dəstək Mərkəzində beynəlxalq baytarlıq və fitosanitar sertifikatları, keyfiyyət sertifikatı, mənşə sertifikatı, vəhşi fauna və yabanı flora növlərinin ixracı üçün icazə, mədəni sərvətin mühafizə şəhadətnaməsi və dini təyinatlı ədəbiyyatın ixracına razılıq sənədi verilir. "Bir Pəncərə" İxraca Dəstək Mərkəzi İqtisadi İslahatların Təhlili və Kommunikasiya Mərkəzinin binasında (Landau küçəsi 16, Bakı şəhəri, tel: 012 521 28 48) fəaliyyət göstərir.

Xatırladaq ki, İqtisadi İslahatların Təhlili və Kommunikasiya Mərkəzinin fəaliyyətinin məqsədi ölkənin dayanıqlı iqtisadi inkişafının təmin edilməsi istiqamətində makro və mikroiqtisadi səviyyədə təhlil və tədqiqatlar aparmaqla, analitik məlumatlar əsasında iqtisadi islahatların həyata keçirilməsi üçün təkliflər, habelə orta və uzunmüddətli dövr üçün proqnozlar hazırlamaqdan, dövlət orqanlarını və qurumlarını həmin proqnozlarla təmin etməkdən, həmçinin iqtisadiyyatın müxtəlif sahələrində Azərbaycan Respublikasının nailiyyətlərinin təbliğini təşkil etməkdən ibarətdir.