"Sumqayıt" futbol klubu daha bir futbolçunun keçidini reallaşdırıb

Sumqayıt, 29 iyul, AZƏRTAC

2022/23-cü mövsümü üçün transfer çalışmalarını davam etdirən "Sumqayıt" futbol klubu daha bir oyunçunu sıralarına qatıb. Klub Filipe Çabi ilə müqavilə imzalayıb.

Klubun mətbuat xidmətindən AZƏRTAC-a bildirilib ki, Portuqaliyanın "Sportinq" (Lissabon) komandasının yetirməsi olan, son mövsümü "Nasional"da keçirmiş 28 yaşlı hücumameyilli yarımmüdafiəçi Filipe Çabi ilə 2 illik müqavilə imzalanıb.

Filipe Çabi karyerası boyunca yetirməsi olduğu "Sportinq"lə yanaşı, "Uniao Madeyra", "Belenenseş", "Kovilya", "B SAD", "Koimbra" və "Nasional" komandalarının uğurları üçün çalışıb. O, Portuqaliyanın U-16, U-17, U-18 və U-19 millilərinə də dəvət alıb.