Sumqayıt, 7 oktyabr, Ətrabə Rzayeva, AZƏRTAC

SOCAR "Azərikimya" İstehsalat Birliyi və Azərbaycan Futbol Federasiyası Assosiasiyasının (AFFA) dəstəyi ilə "Sumqayıt” Futbol Klubunun təlim-məşq bazasında yenidənqurma işləri davam edir.

Klubun vitse-prezidenti Vaqif Ömərov AZƏRTAC–a bildirib ki, 1966-cı ildə istifadəyə verilmiş Sumqayıt şəhərinin əsas idman arenası - Mehdi Hüseynzadə adına stadion öz istismar müddətini başa vurub. Stadion 1979-1980-ci illər və 1993-1994-cü illər ərzində təmirə dayandırılıb. 2010-cu ildə isə "Sumqayıt" futbol klubunun yaranması ilə əlaqədar "Azərikimya" İB Mehdi Hüseynzadə adına şəhər stadionunda təmir işləri aparıb və buranı çempionatın oyunlarının keçirilməsinə hazırlayıb.

Vaqif Ömərov onu da qeyd edib ki, hazırda klubun köməyi ilə şəhər stadionunda müəyyən işlər aparılıb və “Sumqayıt”ın əsas komandası məşqlərini bu idman arenasında keçirir. Əsas komanda ilə yanaşı, akademiyanın bir neçə yaş qrupları da burada hazırlaşır. Bunun üçün klub M.Hüseynzadə adına stadiona maliyyə köməyi də edir.

2011/2012-ci illər mövsümündən Azərbaycan Premyer Liqasında çıxış edən "Sumqayıt" futbol klubu hazırda ev oyunlarını "Kapital Bank Arena"da keçirir. Kompleksin inşası 2012-ci ilin dekabrından Azərbaycan Respublikası Dövlət Neft Şirkəti tərəfindən həyata keçirilib. Arenanın açılışı UEFA-nın sabiq prezidenti Mişel Platininin iştirakı ilə 2013-cü ilin sentyabrın 21-də baş tutub. Qeyd edək ki, "Kapital Bank Arena"da klubun inzibati ofisi ilə yanaşı, 6 paltardəyişmə, baş məşqçinin otağı, akademiya üçün məşqçilər otağı, tibb və dopinq otağı, konfrans zalı, fitnes zalı, geyim və avadanlıq anbarı, texniki anbar, yeməkxana, inzibati heyət üçün otaq, hakimlər otağı və camaşırxana da mövcuddur.

"Kapital Bank Arena"da hazırda iki təbii və bir süni örtüklü standart meydançadan başqa, iki mini futbol meydançasının inşası da tamamlanmaq üzrədir”, - deyən Vaqif Ömərov əsas meydançaya səpilmiş toxumun artıq cücərməyə başladığını bildirib. O, stadionun suvarma sisteminin təkmilləşdirildiyini, köməkçi stadion kimi nəzərdə tutulan təbii ot örtüklü meydançanın da yeniləndiyini vurğulayıb. Süni örtüklü meydança artıq ötən həftədən hazırlanaraq tam şəkildə futbolçuların ixtiyarına verilib. Ölçüləri 40x20 metr olan mini meydançalarda isə son tamamlanma işləri aparılır.