Bakı, 10 may, AZƏRTAC

Beynəlxalq Münasibətlərin Təhlili Mərkəzində (BMTM) ümummilli lider Heydər Əliyevin anadan olmasının 99-cu ildönümünə həsr olunmuş “Ulu öndər Heydər Əliyev və Azərbaycanın xarici siyasəti” adlı dəyirmi masa keçirilib.

AZƏRTAC xəbər verir ki, tədbirdə çıxış edən BMTM-in İdarə Heyətinin sədri Fərid Şəfiyev Azərbaycandakı daxili sabitliyin təməlinin ulu öndər Heydər Əliyev tərəfindən qoyulduğunu diqqətə çatdırıb. Onun sözlərinə görə, ümummilli lider Heydər Əliyevin qəbul etdiyi strateji qərarlar Azərbaycanın 20 il ərzində inkişafına şərait yaradıb.

Azərbaycan Respublikası Prezidenti yanında Dövlət İdarəçilik Akademiyasının rektoru Urxan Ələkbərov Ulu Öndərin həyata keçirdiyi daxili siyasət barədə danışıb və bildirib ki, Azərbaycanın inklüziv inkişafının qurucusu ümummilli lider Heydər Əliyevdir. Rektorun sözlərinə görə, bu siyasət Prezident İlham Əliyevin dövründə də uğurla inkişaf etdirilib.

Sosial Tədqiqatlar Mərkəzinin İdarə Heyətinin sədri Zahid Oruc ulu öndər Heydər Əliyevi iki formasiyanın qəhrəmanı adlandırıb. Onun sözlərinə görə, ümummilli lider Heydər Əliyev xalqın və dövlətin rifahını hər şeydən öndə tutan rəhbər olub.

Xarici İşlər Nazirliyinin nümayəndəsi, səfir Elşad İsgəndərov ulu öndər Heydər Əliyevin yürütdüyü xarici siyasət prioritetlərindən danışaraq onun dövründən başlayaraq Azərbaycanın balanslaşdırılmış xarici siyasət həyata keçirdiyini vurğulayıb. O, həmçinin Ulu Öndərin həyata keçirdiyi iqtisadi quruculuq, beynəlxalq iqtisadi inteqrasiya məsələlərinə toxunub. Elşad İsgəndərov bildirib ki, 44 günlük Vətən müharibəsinin sonunda Azərbaycan torpaqlarının işğaldan azad edilməsi də məhz Heydər Əliyev siyasətinin davamçısı Prezident İlham Əliyev tərəfindən gerçəkləşib.

BMTM-in İdarə Heyətinin üzvü Gülşən Paşayeva ümummilli lider Heydər Əliyevin apardığı əsas xarici siyasət istiqamətlərini qeyd edib və xüsusilə ikitərəfli və beynəlxalq təşkilatlarla əlaqələrdə prioritet tutulan məsələlər barədə məlumat verib.