“ABB-MOSKVA”NIN SANKT-PETERBURQDAKI FİLİALI 5 İLLİK YUBİLEYİNİ QEYD EDİR
Azərbaycan-Moskva Beynəlxalq Bankının (“ABB-Moskva”) mətbuat xidmətindən AZƏRTAC-ın xüsusi müxbirinə verilən məlumata görə, 2008-ci il mayın 28-də bu bankın Sankt-Peterburqdakı filialının Rusiya maliyyə bazarında fəaliyyətinin 5 ili tamam olmuşdur.
Azərbaycan Beynəlxalq Bankının törəmə strukturu olan “ABB-Moskva” öz fəaliyyətini RF ərazisində həyata keçirən, 100 faiz Azərbaycan kapitalına əsaslanan ilk və yeganə bankdır. Şübhəsiz ki, belə bir bankın yaranması Azərbaycan-Rusiya iqtisadi münasibətlərinin dinamik inkişafını təsdiqləyən nümunələrdən biri olub, iki ölkə arasında dostluq və mehriban qonşuluq əlaqələrinin qarşılıqlı hörmət və paritet prinsiplərinə əsaslanan yeni iqtisadi siyasətin təşəkkül tapdığını göstərir.
Bu gün “ABB-Moskva” geniş regional şəbəkəyə, məhsul və xidmətlərin əhatəli spektrinə malik olan universal maliyyə təsisatıdır. Bank Azərbaycan və Rusiyanın biznes strukturları arasında ənənəvi iqtisadi münasibətlərin möhkəmlənməsi üçün şərait yaradılmasında mühüm rol oynayır, dövlətlərarası iqtisadi proqramların işlənib hazırlanmasında, Rusiya bankları ilə müştərək layihələrdə iştirak edir. “ABB-Moskva” fəal kredit siyasəti yeridir, iqtisadiyyatın müxtəlif sektorlarında perspektivli layihələri maliyyələşdirir, ölkələr arasında əmtəə dövriyyəsinin artmasına kömək edir. 2007-ci ildə “ABB-Moskva” rubl və xarici valyuta ilə bank əməliyyatlarının həyata keçirilməsi üçün Rusiya Bankının Baş lisenziyasını almış, 2004-cü ildə Əmanətlərin Sığortalanması Sisteminə daxil olmuş, 2005-ci ildə beynəlxalq “Visa İnternational” tədiyyə sisteminin assosiasiya edilmiş iştirakçısı statusu qazanmışdır. Bütün bunlar biznesin kompleks şəkildə inkişafı üçün imkan yaradır.
Bu gün “ABB-Moskva” öz fəaliyyətinin əsas göstəricilərinə görə Rusiyanın 200 ən iri bankları sırasına daxildir və yaxın bir neçə ildə TOP150 səviyyəsinə çatmağı planlaşdırır. 2007-ci ilin sonunda bankın kapitalı 866 milyon rubl, aktivlərinin məbləği 8.237 milyon rubl, kredit portfelinin həcmi 4.697 milyon rubl olmuşdur.
“ABB-Moskva” pərakəndə fəaliyyət istiqamətini inkişaf etdirmək çərçivəsində xidmət şəbəkəsini genişləndirir. Moskvada bankın 7 ofisi hüquqi və fiziki şəxslərə kompleks xidmətlər göstərir. Bank Sankt-Peterburq və Yekaterinburq şəhərlərində öz filiallarını açmışdır. Sankt-Peterburqdakı filial bazasında Şimal-Qərb regionunda xidmət şəbəkəsini inkişaf etdirmək nəzərdə tutulur. 2006 və 2007-ci illərdə bu istiqamətdə ilk addım kimi iki əlavə ofis açılmışdır. Beləliklə, bu gün “ABB-Moskva” Rusiyanın iqtisadi cəhətdən ən çox inkişaf etmiş 3 regionunda təmsil olunmuşdur. Yeri gəlmişkən, RF-də yaşayan azərbaycanlıların ümumi sayının 70 faizdən çoxu, Azərbaycanla bağlı biznesin isə 75 faizdən çoxu məhz həmin regionlarda cəmləşmişdir.
Sankt-Peterburq filialı bankın biznesinin ümumi həcmində getdikcə daha ciddi rol oynayır. 2007-ci ilin yekunlarına görə, filialın balansı 1099,5 milyon rubl, kredit portfeli 861,9 milyon rubl olmuşdur.
Bankın ən çox tələb olunan, kütləvi və sürətlə genişlənməkdə olan xidmətlərindən biri xüsusi hesab açılmadan Rusiya ilə Azərbaycan arasında pul köçürmələrinə xidmət edilməsidir. 2007-ci ilin sonunda Sankt-Peterburqdakı filialda pul köçürmələrinin ümumi həcmi 24 milyon dollar, xidmət edilmiş köçürmələrin sayı 16000 dollar olmuşdur. Hazırda bankın filialı özünün “Visa” kartlarının fəal emissiyasını həyata keçirir. Bankomatlar və POS-terminallar şəbəkəsi genişlənir, əmək haqqı ilə bağlı layihələr həyata keçirilir. Filialın əməkdaşları daim müasir kart məhsullarının işlənib hazırlanması və tətbiqi ilə məşğul olurlar. Yaxın gələcəkdə beynəlxalq “Master Card” sistemi kartlarının emissiyası planlaşdırılır.
Bankın filialının rəhbərliyi və kollektivi əmindir ki, “ABB-Moskva”nın ilk regional bölməsi zamanın sınağından şərəflə çıxmışdır və o, gələcəkdə də səmərəli və etibarlı fəaliyyət göstərəcəkdir.
