ABŞ ÇİNİN HƏRBİ POTENSİALININ GÜCLƏNMƏSİNDƏN NARAHATDIR
Ağ ev Çinin hərbi potensialının güclənməsindən narahatdır. AZƏRTAC İTAR-TASS-a istinadla xəbər verir ki, bunu Abş-ın dövlət katibi Kondoliza Rays bildirmişdir. O, Konqresin Nümayəndələr palatasının xarici işlər komitəsində dinləmələrdə çıxış edərək, Pekinin öz köhnə orbital meteopeykini ballistik raketin köməyi ilə vurmasını ÇXR-in hərbi iştahasının artmasının həyəcandoğuran əlaməti adlandırmışdır.
Dövlət Departamentinin başçısı demişdir: “Digər dövlətlər belə addım atmamışlar və biz Çinin keçirdiyi sınaqdan narahatlığımızı aydın ifadə etdik”. Onun dediyinə görə, ABŞ belə fəallıqdan narahatdır, çünki bu, bizə ÇXR-in regional və hətta qlobal maraqlarının ciddiliyini göstərir.
O vurğulamışdır ki, ABŞ-ın Çinlə yaxşı işgüzar əlaqələri yaranır. Lakin Rays bu münasibətlərin ikili xarakter daşıdığını qeyd etməklə yanaşı, Şimali Koreyanın nüvə proqramına dair danışıqlar çərçivəsində əməkdaşlığın möhkəmləndiyini vurğulamış və “ÇXR-in hərbi potensialı” sarıdan narahatlıq olduğunu bildirmişdir.
Bölmənin digər xəbərləri
