Bakı, 1 oktyabr (AZƏRTAC). Berklidəki (ABŞ) Kaliforniya universitetinin kampusunun ərazisində partlayış baş vermişdir. Bir neçə nəfər yüngül xəsarət almışdır.

CNN telekanalının verdiyi məlumata görə, bazar ertəsi axşam vaxtı hələlik məlum olmayan səbəblər üzündən kampusda işıqlar sönmüş, bundan sonra partlayış səsi eşidilmişdir.

“Epoch Times” nəşrinin yazdığına görə, kampusda elektrik generatoru partlamışdır.

Partlayış yerində yanğın baş vermişdir. Kampusun administrasiyası məşğələlərin ləğv olunduğunu elan etmiş və hamını kompleksin binalarını tərk etməyə çağırmışdır.

Polis oradakı insanları məcburi qaydada evakuasiya edir.