ABŞ-ın Çindən “de minimis” tədarükünə rüsumları azaltması iki ölkə arasında ticarət gərginliyini yumşaldır
Bakı, 13 may, AZƏRTAC
Ağ evin bazar ertəsi, mayın 12-də verdiyi bir sərəncamla Birləşmiş Ştatların Çindən idxala “de minimis” tariflərini aşağı salmasının dünyanın iki ən böyük iqtisadiyyatı arasında potensial zərər verə biləcək ticarət müharibəsi ilə bağlı gərginliyi azaldacağı bildirilir.
AZƏRTAC xəbər verir ki, tariflərin yumşaldılması həftəsonu Cenevrədə keçirilmiş danışıqlardan sonra Pekin ilə Vaşinqton arasında ticarət mübahisəsində barışıq elan edilməsindən sonra baş verib, Danışıqlar zamanı hər iki tərəf aprelin əvvəlindən bir-birinin mallarına tətbiq edilən rüsumların əksəriyyətini ləğv etməyə razılaşıb.
“Reuters” agentliyi xəbər verir ki, rüsumlar 120 faizdən 54 faizə endiriləcək, 100 dollarlıq sabit məzənnə isə mayın 14-dən dəyişməz olaraq qalacaq. Əvvəllər Çindən poçtla göndərilən 800 ABŞ dollarına qədər dəyəri olan mallar üçün “de minimis” vergi azadlığı onların ABŞ-a rüsumsuz və minimal yoxlamalarla gətirilməsinə imkan verirdi.
Fevral ayında Prezident Donald Tramp iyun ayına qədər qüvvəyə minəcək paketin dəyərinin 120 faizi həcmində vergi və ya planlaşdırılmış 200 ABŞ dolları məbləğində rüsum tətbiq edərək “de minimis” azadlığını dayandırdı və bunu “Shein”, “Temu” və digər e-ticarət firmaları, eləcə də fentanil və digər qeyri-qanuni malların tacirləri kimi şirkətlər tərəfindən istismar edilməsi ilə izah etdi. Son illərdə ABŞ-a rüsumsuz kanal vasitəsilə daxil olan göndərişlərin sayı kəskin şəkildə artıb və bütün paketlərin 90 faizindən çoxu “de minimis” kanalı ilə daxil olub. Bunların təxminən 60 faizi “Temu” və “Shein” kimi malları birbaşa istehlakçıya tədarük edən pərakəndə satış şirkətlərinin rəhbərlik etdiyi Çindən gəlir.
Fevral ayında Prezident Donald Tramp 120 faizlik vergi tətbiq edərək “de minimis” güzəştini ləğv edib.
Ağ evdən verilən açıqlamada endirilən tariflərin mayın 14-dən, saat 12:01-dən etibarən qüvvəyə minəcəyi bildirilib.
Hesabatda 200 dollarlıq sabit rüsum dərəcəsinin təyin edilməsi planının da təxirə salınacağı və 100 dollar səviyyəsində qalacağı qeyd olunub.
“Nomura”nın hesablamalarına görə, Çin keçən il dünya üzrə “de minimis” təşviqlərindən istifadə edərək istehlakçılara birbaşa 240 milyard dollarlıq mal ixrac edib ki, bu da onun xaricə satışlarının 7 faizini və ümumi daxili məhsulunun 1,3 faizini təşkil edir.
Pekin ilə Vaşinqton arasında daha geniş ticarət razılaşması əldə edildikdən sonra Çin yuanı çərşənbə axşamı, mayın 13-də dollar qarşısında son altı ayın ən yüksək səviyyəsinə yüksəlib.
Bölmənin digər xəbərləri
