ABŞ TƏMSİLÇİSİ DAĞLIQ QARABAĞ MƏSƏLƏSİNİN REGİONAL TƏHLÜKƏSİZLİYƏ TƏHDİD OLDUĞUNU ETİRAF ETMİŞDİR
AZƏRTAC xəbər verir ki, Azərbaycanın xarici işlər naziri Elmar Məmmədyarov aprelin 16-da ABŞ müdafiə nazirinin Avropa və NATO siyasəti üzrə müşaviri Daniel Feytanın başçılıq etdiyi nümayəndə heyəti ilə görüşmüşdür.
Qonaq demişdir ki, səfərdən məqsəd ABŞ-Azərbaycan strateji tərəfdaşlığının mövcud durumu, Azərbaycanın gələcək strateji planları, müdafiə sahəsində islahatların vəziyyətini öyrənməkdir.
XİN-in mətbuat xidmətindən bildirmişlər ki, Daniel Feyta regionda sabit aktor və enerji təchizatçısı kimi ölkəmizin rolunu yüksək qiymətləndirmiş, Dağlıq Qarabağ məsələsinin regional təhlükəsizliyə təhdid olduğunu etiraf etmişdir.
E.Məmmədyarov Azərbaycanın ABŞ ilə strateji tərəfdaşlığı davam etdirəcəyini, Birləşmiş Ştatların regionun sabitliyində daha fəal iştirakının vacibliyini bildirmişdir. Azərbaycanda gedən inkişaf prosesi barədə məlumat verən nazir yalnız müdafiə sahəsində deyil, iqtisadi, təhsil və digər sahələrdə də islahatların davam etdiyini diqqətə çatdırmışdır.
Görüşdə, həmçinin Azərbaycan-NATO əməkdaşlığı, Azərbaycanın Əfqanıstandakı sülhməramlı qüvvələrinin sayının artırılması, ölkəmizin enerji təhlükəsizliyində rolu və digər məsələlərə də toxunulmuşdur.
Bölmənin digər xəbərləri
