REGİONLAR
Abşeronda təşkil olunan əmək yarmarkasında 90-dan artıq vakansiya təqdim edilib





Xırdalan, 6 dekabr, Ətrabə Rzayeva, AZƏRTAC
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən işsiz və işaxtaran şəxslər üçün növbəti əmək yarmarkası Xırdalan şəhərində təşkil edilib. Abşeron Rayon İcra Hakimiyyətinin Dəstəyi və Abşeron-Xızı Regional Məşğulluq filialının təşkilatçılığı ilə reallaşan aktiv məşğulluq tədbirində 19 müəssisə iştirak edib və 90-dan artıq vakansiya təqdim edilib.
AZƏRTAC xəbər verir ki, təqdim olunan vakant iş yerlərində əmək haqqının ən aşağı həddi 375 manat, ən yüksək həddi isə 1000 manat təşkil edib. Vakansiyalara müraciət edən şəxslərin CV-ləri qəbul edilərək nəzərdən keçirilib, uyğun namizədlər növbəti mərhələyə dəvət olunublar.
Yarmarkada işsiz və işaxtaran şəxslərə Agentliyin aktiv məşğulluq tədbirləri barədə məlumat verilib, müraciət etmək istəyən şəxslərlə ilkin sorğular həyata keçirilib.