Adaptiv texnologiyaların elektron təhsildə tətbiqi məsələləri araşdırılır
Bakı, 3 may, AZƏRTAC
Azərbaycan Milli Elmlər Akademiyasının (AMEA) İnformasiya Texnologiyaları İnstitutunda adaptiv texnologiyaların elektron təhsildə tətbiqi məsələləri araşdırılır.
AMEA-dan AZƏRTAC-a bildirilib ki, bu barədə institutun əməkdaşı Cəmilə Bağırova elmi seminarda məlumat verib. Qeyd olunub ki, adaptiv və intellektual texnologiyalar elektron təhsil sisteminin keyfiyyətini əhəmiyyətli dərəcədə yüksəldəcək. E-təhsil sistemində tətbiq olunan proqram komplekslərinin əksəriyyəti adaptiv deyil və tələblərə tam cavab vermir.
Adaptiv texnologiyalarla bağlı aparılan araşdırmaların nəticələri haqqında danışan C.Bağırova bildirib ki, bu texnologiyaların tətbiqi pedaqoqlara tələbənin fəaliyyətini izləməyə, fərdi tədris planlarına mütəmadi olaraq dəyişikliklər etməyə, öyrədilənin fərdi xüsusiyyətlərini nəzərə alaraq dərs saatlarını bölüşdürməyə, rast gəlinən problemləri vaxtında aşkar edərək onları həll etməyə imkan verəcək.
Məruzəçi, həmçinin elektron təhsilin adaptasiyası üçün süni intellektin tətbiqi imkanları, elektron təhsilin funksional strukturu və s. haqqında məlumat verib.
Sonda məruzə ətrafında müzakirələr aparılıb, suallar cavablandırılıb.
Bölmənin digər xəbərləri
