Bakı, 2 dekabr, AZƏRTAC

Azərbaycan Dövlət Neft və Sənaye Universitetinin (ADNSU) rektor əvəzi Vazeh Əskərovun başçılıq etdiyi nümayəndə heyəti Latviyada səfərdə olub. Səfər çərçivəsində Azərbaycanın Latviyadakı səfirliyinin dəstəyi ilə Latviyanın aparıcı ali təhsil ocaqları sayılan Riqa Texniki Universiteti, Latviya Universiteti, Latviya Həyat Elmləri və Texnologiyaları Universiteti və Nəqliyyat və Telekommunikasiya İnstitutunda görüşlər keçirilib, dəyirmi masa təşkil olunub, habelə yeni yanaşmalar və qabaqcıl texnologiyaları tətbiq edən yerli müəssisələr ziyarət edilib.

Bu barədə AZƏRTAC-a Azərbaycanın Latviyadakı səfirliyindən məlumat verilib.

Keçirilən görüşlərdə ali təhsil müəssisələri arasında əməkdaşlıq imkanları geniş müzakirə olunub və bir sıra vacib istiqamətlərdə birgə fəaliyyətə maraq ifadə edilib. Görüşlər zamanı ADNSU-nun təcrübəsi və həyata keçirilən layihələrinə dair ətraflı təqdimatlar edilib, həmçinin tələbələr, müəllimlər və tədqiqatçılar arasında mobillik mübadilə proqramlarının yaradılması məqsədilə akademik əlaqələrin genişləndirilməsinin əhəmiyyəti vurğulanıb. Bundan əlavə, qlobal çağırışların həllinə yönəlmiş birgə tədqiqat platformasının qurulması təklif olunub. ADNSU-nun nümayəndə heyəti universitetlərin laboratoriyaları, tədris mərkəzləri və maddi-texniki bazası ilə yaxından tanış olub.

Latviya Universitetində keçirilən iqlim fəaliyyəti və yaşıl enerji mövzusunda dəyirmi masada Azərbaycanın sədrliyi ilə BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının Bakıda uğurla keçirildiyi və iqlim dəyişikliyi ilə mübarizə məqsədilə mühüm qərarların qəbul edildiyi vurğulanıb.

Səfər zamanı nümayəndə heyəti Riqa şəhərində keçirilən və 20 ölkədən olmaqla, 250-dən çox şirkətin qatıldığı “Tech Industry 2024” beynəlxalq sənaye sərgisini də ziyarət edib.