Bakı, 5 noyabr, AZƏRTAC

Azərbaycan Dövlət Pedaqoji Universitetinin (ADPU) Elmi şurasının 2024/2025-ci tədris ili üçün növbəti iclası keçirilib.

ADPU-dan AZƏRTAC-a bildirilib ki, iclasda Elmi şuranın sədri, rektor Cəfər Cəfərov ötən dövr ərzində ali təhsil müəssisəsinin strukturları tərəfindən icra edilmiş layihələr, həyata keçirilən tədbirlər və əməkdaşların işgüzar səfərlərinin nəticələri barədə məlumat verib. Qeyd edilib ki, bu müddət ərzində universitet bir sıra beynəlxalq konfranslara və böyük tədbirlərə ev sahibliyi edib, İstanbul Universiteti və Moskva Dövlət Pedaqoji Universiteti ilə əməkdaşlıq müqaviləsi imzalanıb, Moskva Dövlət Pedaqoji Universiteti və Polşanın Rzeşov Universitetinin nümayəndələri ADPU-da olublar.

Rektor diqqətə çatdırıb ki, COP29-la bağlı universitetdə təşkil edilən silsilə tədbirlər cari müddətdə də uğurla davam etdirilib. Tələbə təşkilatları tərəfindən bu və digər istiqamətlərdə çoxsaylı layihə və tədbirlər həyata keçirilib.

Keyfiyyətin təminatı şöbəsinin müdiri dosent Qalib Şərifov ADPU-nun institusional akkreditasiyasının nəticəsi olaraq Akkreditasiya Komissiyasının yekun hesabatında verdiyi tövsiyə və göstərişlərin icrasına dair fəaliyyət planının həyata keçirilməsi vəziyyəti barədə məruzə ilə çıxış edib. Q.Şərifov bildirib ki, fəaliyyət planına əsasən son 6 ayda görülən işlərlə bağlı Keyfiyyətin təminatı şöbəsinin əməkdaşları tərəfindən müvafiq şöbələrdə monitorinqlər aparılıb və nəticələr təhlil edilib. Strateji inkişaf, keyfiyyət təminatı, təlim və tədris, elmi tədqiqat, idarəetmə sistemi, infrastruktur, beynəlmiləlləşmə istiqamətləri üzrə tövsiyələrin icra vəziyyəti barədə məlumatlar Şura üzvlərinə təqdim edilib.

Eyni zamanda, dosent Qalib Şərifov ADPU-nun inklüziv təhsil siyasəti sənədinin təsdiqi barədə arayış təqdim edib.

Elm və innovasiyalar üzrə prorektor professor Asəf Zamanov elmi dərəcəsi olmayan mütəxəssislərin “SABAH” magistratura səviyyəsində dərs aparmasına icazə verilməsi, elmi rəhbərlərin dəyişdirilməsi, professor və dosent elmi adlarının verilməsi üçün AAK qarşısında vəsatət qaldırılması barədə, Tədris departamentinin direktoru dosent Sənan Əliyev 2025/2026-cı tədris ili üçün tələbə qəbulu üzrə proqnoz yerlərinin layihəsinin təsdiqi barədə məruzə ilə çıxış ediblər.

Rektorun müşaviri Ümid Mehdiyev “ADPU-da Lütfi Zadə adına adlı təqaüdün verilməsi Qaydaları”nın təsdiqi, şəhid və qazi ailələrinin üzvü olan tələbələrin təhsil krediti borclarının silinməsi barədə maliyyə komissiyasının təkliflərini irəli sürüb. Təklif səs çoxluğu ilə qəbul edilib.

Sonda səsverməyə çıxarılan məsələlərin nəticələrinə aid hesablama komissiyasının hesabatı təqdim edilib.