Quba, 2 iyun, Elxan Yusifli, AZƏRTAC

Azərbaycan Dövlət Pedaqoji Universitetinin (ADPU) Quba filialında təhsilini başa vuran gənc mütəxəssislərin xoş soraqları bu gün müxtəlif məktəblərdən, təhsil şöbələrindən, ali təhsil ocaqlarından, ölkənin yüksək səviyyəli dövlət orqanlarından gəlir. Fərəhləndirici haldır ki, Azərbaycan tarixinə Qarabağa “Böyük Qayıdışın” başlanğıcı kimi daxil olan Cocuq Mərcanlı kəndinə vətəndaşlarımızın qayıtmasından sonra bu kənddə uzun illərdən sonra fəaliyyətə başlayan ilk məktəbin direktoru məhz ADPU-nun Quba filialının məzunudur.

AZƏRTAC-ın bölgə müxbiri xəbər verir ki, bu barədə ADPU-nun Quba filialında 2021-2022-ci tədris ili məzunlarının təntənəli buraxılış mərasimində bildirilib.

Filialın həyətində keçirilən tədbirdə müvəffəqiyyət göstəricisi yüksək olan məzunlar, professor-müəllim heyəti, dövlət qurumlarının nümayəndələri iştirak ediblər.

“Məzun-2022” adlı tədbirin əvvəlində Dövlət Himni səsləndirilib, ümummilli lider Heydər Əliyevin, Azərbaycanın azadlığı, ərazi bütövlüyü uğrundan canından keçən şəhidlərimizin əziz xatirəsi bir dəqiqəlik sükutla yad olunub.

ADPU-nun Quba filialının direktoru Yusif Alıyev məzunları təbrik edib, onlara gələcək karyeralarında uğurlar arzulayıb.

Bildirilib ki, ADPU Quba filialının tələbələri bölgənin ictimai həyatında, mədəni-kütləvi tədbirlərində yaxından iştirak edirlər. Filial respublikanın bir sıra ali məktəbləri ilə yanaşı, Türkiyə, Qazaxıstan, Rusiya, Polşa, Ukrayna və başqa ölkələrin elmi müəssisələri ilə sıx əməkdaşlıq əlaqələri qurub. Filialın professor-müəllim heyətinin əməkdaşları, gənc tədqiqatçıları və tələbələri respublika və beynəlxalq səviyyəli elmi konfranslarda, müxtəlif layihələrdə müntəzəm iştirak edirlər.

Tədbirdə məzun olacaq Vətən müharibəsi iştirakçıları Elvin Seyfəddinov, Ayaz Tahirov, həmçinin filialın tədris göstəricilərinə, ictimai fəallığına görə fərqlənən tələbələrinə fəxri diplomlar təqdim olunub.

Məzunların təntənəli buraxılış mərasiminə maraqlı konsert proqramı ilə yekun vurulub.