ADSEA: Güzdək qəsəbəsindəki çirkab su problemini köklü şəkildə həll etmək üçün lazımi fəaliyyət həyata keçirilir
Bakı, 14 aprel, AZƏRTAC
Güzdək qəsəbəsinin yaşayış məntəqələrinin çirkab sularının axdığı gölməçə yağış yağarkən ətraf ərazilərə yayılsa da Ceyranbatan su anbarının mühafizə zonasında quraşdırılmış nasoslarla həmin sular kənarlaşdırılaraq kanalizasiya sisteminə axıdılır.
Azərbaycan Dövlət Su Ehtiyatları Agentliyinin (ADSEA) Suların İstifadəsinə və Mühafizəsinə Dövlət Nəzarəti Xidmətinin şöbə müdiri Rafiq Verdiyev AZƏRTAC-a bildirib ki, suların miqdarı çox olduqda bəzi hallarda Ceyranbatan gölünün mühafizə zonasından yuxarıda yerləşən hasarın ətrafına yığılır, bəzi hallarda isə hasardan aşağı axır, amma Ceyranbatan gölünün mühafizə zonasına çatmır. Onun sözlərinə görə, bu sularla bağlı problemi köklü şəkildə həll etmək üçün hal-hazırda lazımi səviyyədə fəaliyyət həyata keçirilir.
“Ölkə başçısının Sərəncamına əsasən, Müşfiqabad qəsəbəsinin və bütün ərazinin kanalizasiya sularının sisteminin yenidən qurulması və təmizləyici qurğunun quraşdırılması üzrə işlər aparılır. Bununla da həm Müşfiqabad, həm Güzdək, həm də Xırdalanın müəyyən ərazilərinin yaşayış məntəqələrinin tullantı sularını toplayaraq kanalizasiya sistemi vasitəsilə təmizləyici qurğuya nəql edilməsi və orada lazımi keyfiyyət standartlarına uyğun təmizlənməsi, sonra isə Sumqayıt çayına axıdılması nəzərdə tutulub. Bu layihə həm gölün ətrafındakı ərazinin ekosisteminin xeyli yaxşılaşdırılması, həm də kifayət qədər təmizlənmiş suların Sumqayıt çayına axıdılaraq çayın ekoloji axınla təmin olunmasında mühüm rol oynayacaq”, - deyə qurum rəsmisi qeyd edib.
Bölmənin digər xəbərləri
