CƏMİYYƏT
Afrikalı iştirakçı: Azərbaycanın COP29-a ev sahibliyi etməsi ekoloji dayanıqlılıq mövzusunda nümunəvi addımlar atdığını bir daha təsdiqləyir VİDEO
Bakı, 12 noyabr, AZƏRTAC
Azərbaycanda COP29 konfransının təşkilatçılığı yüksək səviyyədə həyata keçirilib. Biz Azərbaycanın müasir və inkişaf etmiş infrastrukturundan təsirlənmişik. Bu tədbir, ölkənin müasir inkişaf səviyyəsini, qlobal ekoloji problemlərin həllinə yönəlmiş səylərini və iqlim dəyişikliyi ilə mübarizə mövzularında verdiyi töhfəni nümayiş etdirmək üçün önəmli bir platformadır. Azərbaycanın bu səviyyədə ev sahibliyi etməsi, onun qlobal iqlim dəyişikliklərinə qarşı mübarizədə mühüm tərəfdaş kimi iştirak etdiyini və ekoloji dayanıqlılıq mövzusunda nümunəvi addımlar atdığını bir daha təsdiqləyir.
Bu fikirləri AZƏRTAC-a açıqlamasında COP29 çərçivəsində ölkəmizə gələn afrikalı iştirakçı, “PESR” şirkətinin direktoru Vale Shonibare söyləyib.
O bildirib ki, COP29 konfransından gözləntiləri var: “Diqqət əsasən bərpaolunan enerji və karbon neytrallığı sahəsində sərmayələrin artırılmasını dəstəkləyəcək maliyyə mənbələrinin cəlb edilməsinə yönəlməlidir. Bu baxımdan, qlobal maliyyə arxitekturasının dəyişdirilməsinə ehtiyac var ki, çoxtərəfli inkişaf institutları bərpaolunan enerji və karbon neytrallığına daha çox sərmayə yatırmaq imkanına malik olsunlar. Bu məqsədlə, zəmanətlər, qarışıq maliyyə alətləri və yerli valyuta kimi mexanizmlərə diqqət yetirilməli, həmçinin inkişaf etmiş ölkələrin inkişaf etməkdə olan ölkələrə daha böyük sərmayə dəstəyi göstərməsinin vacibliyi nəzərə alınmalıdır. Bu COP tədbiri, dəstəyin effektiv şəkildə kanallarla ötürülməsini təmin etmək üçün mühüm əhəmiyyət kəsb edir”.
