Bakı, 22 avqust (AZƏRTAC). Avqustun 22-də UEFA Avropa Liqası yarışlarının pley-off mərhələsi çərçivəsində Ağdamın “Qarabağ” futbol komandası Almaniyanın “Ayntraxt” (Frankfurt) kollektivini qəbul etmişdir. 

AZƏRTAC xəbər verir ki, Tofiq Bəhramov adına Respublika stadionunda keçirilən oyunun 6-cı dəqiqəsində “Ayntraxt”ın futbolçusu Aleksandr Meyer hesabı açmışdır.

Polşalı baş hakim Simon Marçinyakın idarə etdiyi oyunun ilk hissəsi “Ayntraxt”ın 1:0 hesablı minimal üstünlüyü ilə yekunlaşmışdır.

Matçın 75-ci dəqiqəsində Aleksandr Meyer dubl etmişdir. Beləliklə, oyun “Ayntraxt”ın 2:0 hesablı qələbəsi ilə başa çatmışdır.

Komandalar arasında cavab oyunu bir həftədən sonra Almaniyada keçiriləcəkdir.