Ağdaşın kəndlərində çəltik əkininə başlanılıb
Ağdaş, 3 may, Şahnəzər Bəşirov, AZƏRTAC
Ağdaş rayonunun kəndlərində çəltik əkininə başlanılıb.
Rayon Kənd Təsərrüfatı İdarəsindən AZƏRTAC-a bildiriblər ki, sahələrdə toxum səpini işlərinə iki gün öncə start verilib və indiyədək Cardam, Ovuclu, Mürsəl, Qumlax, Şıxlı, Nəvətava, Hapıtlı kəndlərində 50 hektar sahədə çəltik əkilib. Səpin işlərinin mayın sonunadək başa çatdırılması nəzərdə tutulur.
Ötən il Ağdaşın 15 kəndində 2450 hektar sahədə çəltik yetişdirilib və 8245 ton məhsul yığılıb. Biçilən çəltik rayondakı dəyirmanlarda emal olunaraq keyfiyyətli düyü əldə edilib.
Cari ildə isə rayonda ötən ildəkindən 100 hektar çox, yəni 2550 hektar sahədə çəltik əkilməsi nəzərdə tutulur. Kəndlilər hər hektardan 60-80 sentner məhsul götürəcəklərinə əmindirlər. Bu il rayondakı çəltik sahələrindən təxminən 9 min ton məhsulun yığılması gözlənilir. Məhsul yığımına sentyabrda başlanılacaq.
Qeyd edək ki, çəltik bitkisi kombaynla yığılır və rayonda fəaliyyət göstərən 8 düyü dəyirmanında emal olunaraq bazarlara çıxarılır.
Bölmənin digər xəbərləri
