Ağdaşın kəndlərində çəltik əkininə başlanılmışdır
Ağdaş, 6 may (AZƏRTAC). Ağdaşın kəndli fermerləri çəltik əkininə başlamışlar.
Rayon icra hakimiyyətindən AZƏRTAC-a bildirmişlər ki, Cardam, Ovculu, Mürsəl, Qumlax, Şıxlı, Nemətabad, Hapıtlı kəndlərində artıq 150 hektar sahədə çəltik əkini aparılmışdır.
Ümumilikdə cari ilin məhsulu üçün 1250 hektarda çəltik əkini nəzərdə tutulur. Hazırda bəzi kəndlərdə səpinə hazırlıq işləri davam etdirilir. Çəltik əkini mayın sonunadək başa çatdırılacaqdır. Kəndlilər hər hektardan 60-80 sentner məhsul götürüləcəyinə ümidlidirlər. Çünki ötən həftə səpilən toxumun bitmə vəziyyəti və suyun bolluğu bunu deməyə əsas verir. Bu il rayondakı çəltik sahələrindən təxminən 10 min ton məhsulun yığılması gözlənilir.
Ağdaşda çəltik yetişdirmək kəndlilərin dolanışıq şəraitinə müsbət təsir edir. Ona görə də rayonda bu məhsulun istehsalına olan maraq ildən-ilə artır. Çəltik bitkisi yetişdikdən sonra kombaynla yığılır və dəyirmanda emal edilir. Ondan düyü istehsal olunur. Ağdaşda yetişdirilən çəltiyin düyüsü respublikanın bütün rayonlarında satılır. Əgər 2008-ci ildə Ağdaşda 810 hektarda çəltik yetişdirilmişdisə, ötən il bu rəqəm 1180 hektara çatdırılmışdı.
Bölmənin digər xəbərləri
