Ağsu, 3 may (AZƏRTAC). Ağsu Rayon Gənclər və İdman İdarəsinin təşkilatçılığı ilə məktəblilər arasında ulu öndər Heydər Əliyevin 90 illiyinə həsr olunmuş mini futbol yarışları başa çatmışdır.

AZƏRTAC xəbər verir ki, aprelin 30-da şəhər stadionunda başlayan yarışlarda 11-14 yaşlarında olan məktəbli idmançılar iştirak etmişlər.

Yarışlar dairəvi sistem üzrə keçirilmişdir.

Final oyununda şəhərdəki 1 nömrəli və Pirhəsənli kənd tam orta məktəblərinin komandaları qarşılaşmışlar. Gərgin idman mübarizəsi şəraitində keçən qarşılaşmada Pirhəsənli kənd məktəbinin futbolçuları 2:1 hesabı ilə qalib gələrək birinci yeri tutmuşlar.

Üçüncü yer uğrunda şəhərdəki 2 və 5 nömrəli tam orta məktəblərin komandaları yarışmışlar. 2 nömrəli məktəbin futbolçuları daha yaxşı oyun nümayiş etdirərək 3:2 hesabı ilə qalib gəlmiş və üçüncü yerə sahib olmuşlar.

Qalib komandalar rayon gənclər və idman idarəsinin diplomu və qiymətli hədiyyələri ilə mükafatlandırılmışlar.